S’ANAP, Assòtziu Pensionados Artesanos de Confartigianadu, pedit a sos parlamentares sardos de pessare a su bene comune e no a sos egoismos e a sos interessos de parte polìtica, a manera de trantzire sa crisi de guvernu chi, in custu tempus de crisi sòtziu-econòmica e polìtica, arriscat de nch’acabbare cussas categorias giai in pistighìngiu, che a cussa de sos pensionados, chi in Sardigna sunt belle 450 mìgia.
Sa presidente ANAP Sardigna Paola Montis pedit de èssere cuncordes difendende su guvernu, ca una crisi como, cun una pandemia in atu, sa gherra in Ucraina, sos rincaros energèticos, podet èssere unu perìgulu pro s’istabilidade sotziale e econòmica de s’Itàlia.
A filupende sunt sos servìtzios sotziales, assistentziales e sanitàrios, cunsiderados fintzas a como diritos achiridos e chi sunt mustrande totu sa debilesa issoro.
A custu puntu est pretzisu, segundu ANAP, chi sas istitutziones polìticas, sotziales e produtivas siant cuncordes e traballent paris, ponende in parte sos utentes e sas rapresentàntzias de sos tzitadinos e de sos pensionados puru, de cunsiderare una sienda in su volontariadu, in sos setores sanitàrios e sotziu-sanitàrios.
S’ùnicu obietivu de sas istitutziones, pro ANAP, est cussu de promòvere e fàghere cantu prima provedimentos cuncretos pro sas comunidades, sas impresas, sas famìlias, sos salàrios e sas pensiones, oe in perìgulu pro s’aumentu de sos prètzios de s’energia e de sos benes de prima netzessidade.
Mariantonietta Piga