S'Alighera in bèndida: cale turismu cherimus?

S'Alighera in bèndida: cale turismu cherimus?

Su lunis imbeniente amus a ischire si sas osteras prus famadas de s’Alighera ant a èssere comporadas dae unu grupu terramannesu. Non semus faeddende de una o duas posadas minoreddas, ma de su Carlos V, de sa Villa Las Tronas, de sa Baia di Conte e de su mesu de sas istruturas de sa tzitade, cun calicuna serradas dae annos. Ma chie est su grupu chi cheret comporare sas osteras de s’Alighera? Sa holding si narat Elaris, giughet sa sea in Milanu e est un’azienda chi traballat in su ramu de s’energia birde e in s’informàtica, ghiada dae Antonio Stillitano, unu calabresu. Dae cussu chi paret, tando, est gente pagu esperta in s’ammanìgiu de albergos e de istruturas de custa genia. Sa Comuna de sa tzitade e sa Regione sunt tentende sas tratativas e ant pedidu carchi garantzia, ma pro como pagu s’ischit de ite est sutzedende, finas ca est una bèndida intre privados.

Calicunu est istadu cuntentu dae sa noa, narende chi gasi podent suprire dinari e fundos istràngios pro agiudare un’economia in dificultade. Ca est beru chi carchi ostera de sas chi sunt in bèndida sunt mesu disamparadas dae meda. Est beru fintzas chi sa crisi de sa pandemia a postu a ghenugros in terra unu setore intreu. Ma bèndere sa majoria de sas posadas a gente chi no est sarda podet fàghere devènnere su turismu un’economia chi isfrutat sa Sardigna pro fàghere dinari, chi posca essit dae s’ìsula e faghet crèschere àteros logos, lassende inoghe petzi pagos istipèndios: un’indùstria coloniale, finamentas prus de cant’est como. In prus, dae fora non si cumprendet meda su pro ite de s’achistu de albergos dae una sotziedade chi produit e traballat in un’àteru ramu, e custu faghet oriolare pro su benidore de custas istruturas.

Niunu furat a nemos, est craru. Ma si faeddat meda de s’importu pro s’economia isulana de su turismu in Sardigna, ma si faeddat belle che nudda de cale genia de turismu cherimus e chie e cun cale punna lu depet fàghere. Forsis est bènnida s’ora de si pònnere carchi dimanda.

Gabriele Tanda

Leave a comment

Send a Comment

S'indiritzu email tuo no at a èssere publicadu. Is campos pedidos sunt signados *