Nch’at coladu belle una chida dae s’abbolotu chi at interessadu su mundu de sa seguresa informàtica, cando unu fiotu de ransomware (atacu chi tzifrat sos sistemas pedende unu riscatu pro los torrare a ativare) at cajonadu in totue dannu mannu a sos server VMware ESXi impreados pro sa virtualitzazione de sas màchinas.
Su 3 de freàrgiu, su provider frantzesu OVHCloud aiat dadu a ischire sa noa de custa undada de assàchios ispainada peri su globu ingendrende pànicu e chimentos.
Ma sa noa, prus a prestu, deviat èssere sa de sa vulnerabilidade chi est nòdida dae su 2021 (https://cve.mitre.org/cgi-bin/cvename.cgi?name=CVE-2021-21974); gasi etotu sa de sa patch pro bi pònnere remèdiu (https://www.vmware.com/security/advisories/VMSA-2021-0002.html). Ca b’at màchinas chi, dae duos annos, galu sunt a las agiornare.
Un’atacu, duncas, chi at interessadu belle totu su mundu (semper e cando in Itàlia sunt pagos sos server vìtimas e non pertocant sas àreas crìticas) ma chi podiat èssere iscansadu installende sas patch e sanende sa farta.
Gianfranca Orunesu
(foto Christiaan Colen, Wikimedia Commons)
Leave a comment