Su navigadore Google Chrome est faghende torra faeddare in contu de seguresa informàtica pro more de una rete prus chi non manna de estensiones malèsigas. Unu raportu publicadu dae pagu dae sa sotziedade Socket at difatis identificadu 108 estensiones progetadas non pro ofèrrere ebbia sas funtzionalidades promissas, ma fintzas pro operare in s’umbra a dannu de s’utente.
Mancari las apant publicadas isvilupadores diferentes, sos espertos ant agatadu un’infrastrutura ùnica de cumandu e de controllu a palas de s’operatzione, sinnu de una campagna coordinada e sofisticada punnende a sa regorta de informatziones sensìbiles e a insertare publitzidade non cherta nen disigiada.
Su mecanismu de atzione iscobertu est tramposu a beru ca custos istrumentos (client pro TikTok e YouTube, utility pro sa gestione de sas pàginas web etc) resurtant chi funtzionant de su totu. In su mentres chi s’utente impreat su servìtziu, s’estensione ativat in background protzessos pro furare datos personales, intertzetare comunicatziones in prataformas comente Telegram e, carchi borta, abèrrere backdoor in su navigadore.
Sa cosa chi prus assustat pertocat però sa regorta de sos identificativos unìvocos de sos contos Google: si tratat de datos immutàbiles chi permitent a sos malintragnados de sighire s’atividade de una persone cun insistèntzia, fintzas s’in casu esserent cambiadas password o indiritzos de posta eletrònica. Mancari su nùmeru cumplessivu de iscarrigamentos carculadu nch’est in sas 20.000 unidades, sa minetza abarrat arta ca maicantas de custas estensiones resurtant galu a disponimentu in su Web Store ufitziale.
Sa chistione est pesende interrogativos noos pro su chi pertocat s’eficatzidade de sos controllos preventivos de Google. Abarrat sa netzessidade, pro sos utentes, de dare atentzione màssima, limitende s’installatzione de cumponentes agiuntivos a sos chi sunt netzessàrios a beru.
Gianfranca Orunesu
_________________________________________________________________________________________________________________________________________________
Attività realizzata col contributo della Regione Sardegna – IMPRENTAS 2025-2026. LR 22/2018, art. 22