Sa tragèdia de sa Moby prince e sa Somàlia

Sa tragèdia de sa Moby prince e sa Somàlia

Sa commissione parlamentare de iscumbata at intregadu su resurtu de sas chircas fatas in custos annos a subra de su disacatu de sa Moby prince de su deghe de abrile de su 1991 in ue sunt mortas chentu baranta persones.

In antis sas iscumbatas aiant dadu sa neghe a sa nèula, a una faddina de su cumandante de su naviu o fintzas a un’esplosione in intro de su traghetu prima de si atumbare cun sa petroliera Agip Abruzzo e leare fogu. Sa petroliera non podiat istare in cussu tretu de su portu de Livorno, ma s’Eni no at mai acraridu comente mai fiat in ie e de chie fiat sa neghe. A peorare s’apretu, in cussu note de prus de trint’annos a como, sos sucursos sunt tzucadu cun unu trigadiu mannu, e nemos at galu cumpresu comente mai.

Dudas e istampos chi cun custa cummissione s’ismànniant. Difatis s’iscumbata faeddat de una tertza nave chi fiat a dae in antis de sa Moby prince e chi at custrintu su cumandante a atumbare contra a s’Agip Abruzzo. Galu non si cumprendet però de cale genia siat custu tertzu naviu. Sas ipòtesis sunt duas: carchi “bettolina” chi fiat furende unu pagu de petròliu, o s’Oktobaar II una barca de sa sotziedade Shifco. Sa sotziedade est sa matessi a subra de sa cale fiant iscumbatende Ilaria Alpi e Miran Hrovatin ochidos su 20 de martzu de su 1994 in Mogadìscio.

Unu Paisu, sa Somàlia, chi in sos primos annos Noranta at àpidu unu rolu de importu. Difatis dae nadale de su 1992 a maju de su 1994 at bistu sa missione de s’ONU in ue at partetzipadu s’Itàlia e chi est ammentada ca sos sordados italianos torturaiant e ochiant sos tziviles. Ma est fintzas su perìodu in ue ant betadu a terra s’elicòteru Volpe 132 (2 de martzu 1994) chi aiat, forsis, iscobertu unu tràfigu cuadu de armas pro sa Somàlia in su mare cara a su sartu de Chirra.

Totu cosas acontèssidas a pustis de s’intzidente de sa Moby prince, ma chi como parent ligadas in una retza ùnica de segretos e chi dant una lughe prus iscura a una disaura niedda e trista.

(redatzione)

Leave a comment

Send a Comment

S'indiritzu email tuo no at a èssere publicadu.