Su Covid est torrende, ma como est unu pagu diferente. B’at prus o mancu unu sessanta pro chentu de sardos vatzinados nessi cun una dose e, finas si sos contagiados sunt creschende, sos ispidales sunt gasi bòidos, mescamente de malàidos graes, de custos su prus no est vatzinadu. Sunt pagos però is mèigos tranchillos: cale sunt sos arriscos de custa situatzione noa?
S’isetu de sa campagna vatzinale fiat de firmare su tràvigu de su Covid ca su virus girende de mancu, mudat prus pagu e prus a lenu, sos vatzinos abarrant eficatzes e si podet torrare a sa normalidade cun prus aficu. Ma sos nùmeros de sos vatzinados sunt creschende a lenu e custu cheret nàrrere arriscos mannos de torrare a una serrada, non s’ischit cantu simigiante a sas de sos annos colados. Custu ca su virus podet galu mudare, e sa cantidade de sos chi si podent ismalaidare est galu artu meda. Si sighit gasi, sos issollòrios de chie non si cheret vatzinare sunt fuliende a s’arga sos isfortzos chi amus fatu totus.
In prus sunt lompende a Sardigna turistas medas, dae onni chirru de Europa e de su mundu, chi nemos est compidende. Sa timoria est sa matessi de su barigadu: dare cale si siat istorbu a sos bisitadores los podet assuconare e, pro neghe de custu assustu, diant pòdere isseberare àteros logos. In custu pensu est mègius a nos leare nois su Covid, chi infadare un’iscuta sos de fora chi batint soddos. Sa tristura de custa idea s’aunit a sos gastos chi sos controllos tenent, dinari chi nemos cheret bogare. E tando “serramus sos ogros e isperamus bene” narant chie at isseberadu custa lìnia.
In su mentres su guvernu, bidende sa situatzione, est pensende a pònnere sa tèssera birde – unu documentu chi proet chi su vatzinu est istadu fatu – pro intrare in cada logu serradu (dae su tzìnema a su tzilleri). Sas chèscias sunt giai inghitzende e in Frantza, in ue sa medida est giai lege, b’at manifestatziones medas contra.
Pro su de tres istios de epidemia sas faddinas s’annanghent a sa revessura. Istracos, comente chie at bidu su matessi film malu un’àtera borta, amus a bìdere ite nos at a aparitzare s’atòngiu.
(redatzione)
Leave a comment