Sa Regione Sardigna atzèllerat in riferimentu a s’amparu de sos datos e de sas infrastruturas digitales de sos entes locales, ponende tres milliones de èuros pro su triènniu 2026-2028. Su provedimentu, aprovadu dae sa Giunta regionale cun proposta de s’assessora de sos Afares generales Mariaelena Motzo, punnat a frunire a sos Comunes sardos sos istrumentos netzessàrios pro s’amparare dae sas minetzas de su cybercrime (chi sunt creschende) e pro garantire sa continuidade de sos servìtzios essentziales ofertos a sos tzitadinos.
In tempos chi sa digitalizatzione de s’amministratzione pùblica est oramai unu pilastru de importu, sa vulnerabilidade de sos sistemas informàticos rapresentat unu perìgulu non pro sa privadesa de sos sìngulos ebbia, ma pro s’operatividade istitutzionale intrea. Sas risursas las ant a distribuire in cuotas annuales de unu millione de èuros e sunt assignadas pro mèdiu de un’avisu pùblicu pro chi sas amministratziones locales si dotent de su Documentu comunale de seguridade tzibernètica.
Custu istrumentu operativu est cunsideradu su chiu de s’istrategia regionale, ca permitet de mapare sos sistemas chi esistint, individuare sos puntos dèbiles e pianificare sos interventos de difesa prus urgentes. S’assessora Motzo at evidentziadu comente su disafiu tecnològicu siat cumplessu a beru pro sos tzentros minores, chi a s’ispissu sufrint de una farta crònica de cumpetèntzias tècnicas e de resursas finantziàrias dedicadas. Sa Regione si proponet duncas comente partner istratègicu a costàgiu de sos amministradores in unu percursu chi non pertocat petzi s’achistu de software, ma s’evolutzione culturale de sos entes. S’initziativa contat fintzas sa collaboratzione de sa Politzia postale e de s’Universidade de Casteddu, chi ant a contribuire a istèrrere sas lìnias ghia operativas e sos istandard de seguridade elevados.
Gianfranca Orunesu
(Foto de Sora Shimazaki)
_________________________________________________________________________________________________________________________________________________
Attività realizzata col contributo della Regione Sardegna – IMPRENTAS 2025-2026. LR 22/2018, art. 22
Leave a comment