In Terra Sarda, editziones Maestrale, sunt regortos tres iscritos chi Ernst Jünger aiat dedicadu a sa Sardigna.
Lòmpidu pro sa prima borta a s’Ìsula in su mese de maju de su 1954, su pensadore tedescu aiat sighidu a torrare ogna annu in s’istadiale, pro prus de binti annos, in s’ìsula de Santu Pedru.
Su primu cuntatu cun sa realidade sarda però dd’aiat tentu in Crabonaxa, chi in su testu est mutidu Illador.
In sas chidas coladas in ie s’iscritore tedescu podet soddisfàghere sa passione pro s’entomologia e pro su mare.
Jünger s’agatat in unu mundu atemporale, galu pro pagu premodernu, bidu ca pròpiu durante sa permanèntzia sua fiant ponende sa lughe in sa bidda.
Pro sos ogros suos cuddu logu rapresentat un’edade àurea, mancari pòvera ma prena de allegria, cudda allegria chi podent dare una chena cun sos piscadores, sa bista de una gama de berbeghes o de boes maestosos.
Su libru oferit momentos de pensamentu subra s’invasione de sa tècnica, bida dae Jünger in manera negativa. In su sartu sa màchina a motore podet cantu trinta òmines chi messant, est beru, ma cantos òmines ant traballadu pro fàghere cudda màchina e dda pònere in caminu?
Su matessi problema esistit pro sa pompa a motore chi in pagu tempus nche diat iscartziare su traballu de s’aineddu in s’ortu. “Sarà la liberazione dell’asinello”, narat, cuende su dispraghere, a su mere de s’animale, chi est de acordu. Ma a coa finit sa frase tra se “… poi sarà macellato e servito a tavola in forma di salame”.
A pustis de una vida avventurosa, intre Legione Istràngia, Prima Gherra Mundiale, in ue est istadu pluridecoradu, Segunda Gherra Mundiale, Ernst Jünger est mortu in su 1998 a s’edade de 103 annos. Innamoradu de sas ìsulas, massimamente de sas de su Mediterràneu, bidas comente logu interiore, de cudda Sardigna de su 1954 at iscritu, in Terra Sarda:
“Si finirà qui per vivere come si vive dappertutto. Meglio, probabilmente. Ma in modo più felice? È una questione controversa”.
(gianni muroni)
Leave a comment