Giòbia mangianu chitzo Putin at dadu s’òrdine a s’esèrtzitu russu de assemidare s’Ucràina. Sas tropas sunt intradas mescamente dae tres giassos: dae sa Crimea, dae sa Rùssia e dae sa Bielorùssia. Si eris pariat chi sa gherra podiat durare belle e pagu, oe s’esèrtzitu ucràinu in paris cun sa populatzione est resessende a aguantare. O a su nessi gasi paret, ca sas noas sunt medas ma a s’ispissu confusas e chi non s’ischit si sunt bera o fartzas. In sa gherra chie morit prima est sa veridade, ca onniune canta su cantu sou chirchende de cumbìnchere chi est binchende.
Putin paret chi siat punnende a betare a terra su guvernu ucràinu, prus chi non conchistare sas duas provìntzias russòfonas, ca cheret batire su Paisu a una lìnia prus serente a sa Rùssia. S’Europa e sos USA si sunt moende in una manera semper prus assuconosa: dae sas santziones sunt lompende a ammanigiare tropas in sos Paisos a curtzu a s’Ucràina e sa Rùssia. Pro ischire sas resones betzas de custa gherra podides incarcare inoghe e inoghe.
(redatzione)
Leave a comment