Est dae oramai meses chi su tzentru de sa Sardigna est prenu de tzilibirche e su problema si nch’est ispartzinende in totue. Est intrende in sas biddas e est leende àteras zonas. Sa Regione però no est fatende nudda chi potzat isòrvere s’apretu. Tropu mannu e tropu a tesu dae via Roma su problema. In su mentres s’ìsula est in sa mesa de sas ispeculatziones energèticas e sos atores sunt ordimingende comente l’isfrutare mègius. Dae carchi càrculu paret chi sa produtzione de s’energia in Sardigna at a èssere belle su dòpiu de sa chi est como: giai como est su 40% in prus de sa chi nos serbit. Su prus de su balàngiu at a andare addae de su mare e in Sardigna at a abarrare sas istruturas ocupadas. Fintzas pro custu sa Regione faghet pagu e nudda de importu.
Custos sunt duos apretos mannos, ma in sos prus minores sa situatzione no est diferente. Nemmancu su “reimpasto”, famadu e minetzadu, est essende a campu. Paret chi s’arressada de su Covid non siat agabbada in sa Sardigna. Ah, fintzas sa pandemia est torra creschende a lenu a lenu.
(redatzione)
Leave a comment
Ant a èssere ispetendhe chi su tilibirche che intret a nues a ocupare s’istàntzia de su Presidente e de sa Giunta e mancari fintzas sa sede de su Cossizu regionale de Via Roma in Castedhu, in pompa magna, in “marcia trionfale”.