Poesia e limba, l’ischimus, duos sustantivos feminiles sunt. Maschile, imbetzes, est su contu chi ant istèrridu in sos tempos colados. Ca sa terra nostra, a bias pintada cun lebiesa comente unu rennu matriarcale (cada tantu essit a campu custu àteru, de contu), paret chi apat tentu petzi meres de domo e non maistras de versu. Pedra Tzilla, poeta benetutesa, a custa narratzione l’at nâdu chi nono cun sas chircas suas peri sa Sardigna e, a concruos de custu traballu, cun su libru “Sa poesia de sas fèminas, dae su ‘700 a sos annos chimbanta de su ‘900”. Custu est unu passàgiu de s’istèrrida, cun s’ispera chi custu libru siat, in s’impreu chi nd’amus a fàghere, sa mègius manera de ammentare a Pierina, a su nessi dae cras, 8 de martzu.
màuru piredda / foto de Ale Cucchi
«Manu manu chi mi so apassionada a sa poesia mi so abista chi dae sa literadura poètica sarda, mascamente in sas pubbricadas chi arrivint finas a sos annos chimbanta de su sèculu passadu, mancaiat belle de totu sa ‘oghe de sas fèminas. Epuru pro sa connoschèntzia chi apo e pro cantu apo pòtidu acrarare andende manu manu in custa chirca, sas fèminas in Sardigna ant sempre cantadu, in sos vàrios cuntestos de sa vida. Las intendiaimus ninniende criaduras o cantende sos mortos, guasi a che las cherrer disterrare in sos confines de sa vida. A finitia mi so chèrfida preguntare si non fit cosa meritòria de bi ‘etare un’ograda, pro chircare carchi trata, de sos càntigos irmentigados de sas fèminas. Apo iscobertu chi suta suta e mancari a boghe bassa cantaiant puru issas sos acadimentos de onzi die, no nde dat cunfrimma s’istudiosu tissesu Andria Mulas, cando contat de una fèmina in Tissi in d-unu carrasegare. “Essa non avrà in quella sera improvvisato meno di trecento versi, e posso soggiungere, senza sbagliarne uno”. In sos intentos chi apo a coro no mi illudo de prenare su bòidu mannu chi su mudine de su tempus at lassadu, ma ispero de ammustrare chi, mancari in palumbrinu, sa ‘oghe de sas fèminas bi fit sempre. E tenzo aficos de torrare carchi sonu a sas cantadoras nostras restadas chena ‘oghe».
Su libru est inoghe: https://ilmiolibro.kataweb.it/libro/poesia/189226/sa-poesia-de-sas-fminas-2/
Leave a comment