Su Cussìgiu de Amministratzione de s’Agentzia Italiana de su Fàrmacu (AIFA) — s’ente chi sèberat cale meighinas si podent impitare in Itàlia, cun cale prètziu e in cale manera — at naradu chi sa pìndula anticuntzetiva non podet galu èssere in donu, ca no at cumpresu bene pro cale edade custa medida andet fata. Siat su comitadu tècnicu-iscientificu siat su comitadu econòmicu aiat decraradu chi sa medida fiat pro totu cantas sas fèminas in edade fecunda e chi su gastu pro sas càscias de s’Istadu non fiat gasi meda, petzi 140 milliones de èuros.
E tando pro ite s’est agatadu cust’àteru istorbu? Su CdA de s’AIFA est a mutida polìtica e tres de sos chimbe giassos totales de su Cussìgiu sunt ocupados dae Palù, Caparini e Carradori, persones serentes a sa lìnia de sa Lega e de sa dereta. S’ischit chi a custu guvernu no agradant sos deretos de sas fèminas pro su chi pertocat sa reprodùida. In mancu un’annu sa dereta at presentadu bator dissìnnios de lege pro pònnere àteros istorbos a s’abortu e minimare sas possibilidades de sa lege 194: unu de Maurizio Gasparri (FI), unu de Massimiliano Romeo (Lega), unu de Isabella Rauti (FdI) e unu de Roberto Menia (FdI).
Pro como non sunt istadas chistionadas in Parlamentu, ma sa voluntade de sa majoria est crara, fintzas si no est mentovada a craru in sos mèdia. Bisòngiat de nàrrere chi fàghere in manera cuada e a sa muda, deneghende in sas decraradas pùblicas no est una manera noa de si cumportare pro sas dereta. Su guvernu non cheret andare contra a sos pensos de sa majoria de sa sotziedade, ca non cheret pèrdere votos. Nessi pro como, posca chi sa RAI at a èssere annoada amus a bìdere.
Gabriele Tanda
Leave a comment