Chie dae minore andaiat a sa novena de Nadale, s’ammentat sas cantones de Pedru Casu. Sas prus famadas sunt Naschides est, Andemus a sa gruta e Note de chelu, ma in pagos ischint chi bi nde sunt noe, cada una pro onni die de sa novena. Sas àteras sunt: Acculzu a Betlemme, A sos primos rigores, Cand’est nadu Gesus, Duos isposos a s’iscurigada, Glòria: it’est custa armonia?, In sa note profunda. Mancari in medas pensant chi siant “de sa traditzione”, sas cantones faghent parte de una regorta essida in su 1927. Sas rimas sunt fàtzile a las ammentare e finas sas mùsicas, a firma de Agostinu Sanna, punnant a s’istichire in sa conca sena chircare pretziosismos.
S’autore est unu de sos iscritores sardos famados de s’inghitzu de su Noighentos. Aiat iscritu romanzos in italianu reconnòschidos de gabbale dae Deledda e Papini (su prus famadu est Notte sarda). Casu fiat meda connòschidu finas pro sos artìculos chi iscreiat in giornales italianos de primore, comente «La Domenica del Corriere» e «Il Giornale d’Italia», e in gazetas de Sardigna comente «La Nuova Sardegna» e «L’Unione Sarda». Pro s’atividade sua de iscritore coleit problemas cun sa Cùria e pro carchi tempus no aiat prus pòdidu iscrìere in rivistas non religiosas.
Pro sa limba sarda s’impinnu suo est istadu mescamente pro sa poesia. Intre sas àteras òpere in sardu, curiosos sunt duos poemetos: Su resuscitadu e Sa cantada de sa cuba. In su primu unu tziu rinaschit a pustis de chent’annos dae sa morte e s’agatat in unu mundu totu diferente dae cussu chi aiat lassadu; in su segundu est contada s’istòria de una cuba dae cando fiat chercu a cando at acollidu sa malvasia. Ambos duos sunt iscritos in versos sardos a règula. Àteras òperas de importu mannu sunt istadas sas bortaduras in sardu de sa Divina Commedia e Dei Sepolcri. Sa prima mescamente at giradu meda, e fiat connota dae meda gente ca fiat unu disafiu mannu siat pro sa limba sarda siat pro su poeta.
Semper in sardu sunt sas Prèigas chi teniat in giru pro sa Sardigna, esempru de arresonos in sardu subra de temas difìtziles. Difatis Pedru Casu fiat famadu comente preigadore de primore e beniat mutidu dae parròchias medas pro sas dies nòdidas de sa bidda. S’istile auniat seriedade e befas e su lèssicu fiat contivigiadu meda. No ispantat tando chi in sa vida sua at acabidadu paràulas antigas, e a s’agabbu at fraigadu unu vocabulàriu de prus o mancu chimbantaghimbe mìgia faeddos. Unu traballu chi pro tempus meda est istadu imbertu in sos archìvios e chi est istadu postu in retza (inoghe) petzi in su 2011 pro more de s’ISRE.
Unu personàgiu de importu pro sa limba e sa literadura sarda. A l’ammentare oe est unu modu galanu pro augurare a su sardu unu benidore lughente.
Gabriele Tanda
Leave a comment