In tempos de superinfluèntzia e de superlega est bastante chi unu social influencer atachet a sa polìtica de sa Lega pro prenare unu bòidu polìticu in su campu (semplifichemus) progressista. Su rapper Fedez, chi dae tempus est imbiende messàgios càrrigos de denùntzia, cun una parlata pùblica dae sa pratza de su cuntzertu de su primu de maju at denuntziadu s’omofobia de s’ex partidu padanu. Parlata chi moviat dae s’iter de su Ddl Zan e chi a bisu de sa Rai (chi – isputanada a dovere – nd’essit a manos iscutas) non fiat dèghida.
Semper e cando, mancari apretziende su chi at naradu (finamentas dende colore a unu mundu musicale cun paritzos messàgios isciovinistas), non semus faeddende de un’artista militante ma de un’azienda mera e sìnchera chi si movet in intro de su mercadu, mescamente in tandem cun sa mugere e cun su marcu “Ferragnez” (a su presente prus potente de una fusione intre Goku e Vegeta). Semus faeddende de “comunicatzione sotziale”, de “responsabilidade sotziale de s’impresa”, est a nàrrere implicatziones de màdrighe ètica in intro de sa visione istratègica de sa matessi impresa.
A banda Ceres e Taffo chi dòminant sas retes sotziales cun sa publitzidade issoro, pensemus a Benetton. «Dae prus de trinta annos – leghimus in sa pàgina issoro –, Benetton Group impreat sos canales globales de comunicatzione pro ispainare messàgios sotziales in contu de ingiustìtzias e de problemas de sas sotziedades nostras e pro dare impèllida a una dibata cuncreta conca a sa solutzione issoro». De Benetton, cun una chirca in rete, diamus pòdere ischire àteru. Pro nàrrere.
Ma torremus a Fedez. Ca elenchende sas chi a bisu de sa Lega fiant prioridades, a s’imbesse de su Ddl Zan, at mentovadu, belle riende·si·nde, «s’indennidade de bilinguismu pro sos politziotos de Boltzanu». Pro seguru sos deretos linguìsticos non nche sunt in intro de s’agenda de Fedez (chie l’istimat cheret chi bi lu fatzat cumprèndere); pro seguru est difìtzile a paragonare a Boltzanu cun sa Sardigna (e duncas, nos agradet o mancu, sa limba de un’àteru istadu cun una limba de minoria de s’istadu italianu); pro seguru nde diamus pòdere faeddare de s’indennidade (lampu a paràula fea!) s’in casu potzat èssere una resursa pro sa limba nostra o mancu.
E pro la tancare, a dae chi fìamus faeddende de responsabilidade sotziale de sas impresas, forsis est lòmpida s’ora pro fàghere cumprèndere a sas nostras chi s’impreu de su sardu in sa comunicatzione issoro est responsabilidade manna.
Màuru Piredda
Leave a comment