Est essida sa proposta de lege n. 1 de sa legisladura n. 17. L’at presentada in su Cussìgiu regionale su Grupu “Orizzonte Comune”, chi nde faghent parte Francu Cuccureddu, Lisandru Porcu, Sarvadore Cau e Larentu Cozzolino. Pertocat sa nàschida de sa Macroregione de Sardigna, Còrsica e Baleares. Si tratat, narant, de su progetu prus de importu pro dare una parte tzentrale (non geograficamente ebbia, ma finas dae su puntu de bista istitutzionale, polìticu e econòmicu) a sa Sardigna in su Mediterràneu e in Europa. Unu mèdiu (chi sas istitutziones europeas l’ant prevìdidu dae su 2009 e l’ant giai postu in campu in bator àreas: Bàltica, Danubiana, Alpina e Adriàticu-jònica) pro parare fronte in manera istratègica a problemàticas particulares de sos territòrios, chi interessant una pluralidade de regiones chi faghent parte de Istados diferentes, in s’Unione Europea e in foras de s’Unione Europea.
Sa Sardigna podet, ponende·si de acordu cun Còrsica e Baleares, finas formende unu GECT (Grupu Europeu de Cooperatzione Territoriale), pònnere in campu unu disinnu chi rapresentet su ponte intre sas duas rivas de su Mediterràneu otzidentale: Ispagna,Frantza e Itàlia, in su continente europeu, Marocu, Algeria e Tunisia, in cussu africanu.
De seguru est unu caminu longu, ma sa punna est a cambiare sas cunditziones de s’Ìsula nostra, cun s’idea de istabilire unu raportu astrintu e diretu cun sas istitutziones europeas e de afrontare totus in pare sos temas de sa continuidade territoriale, de sa defensa de s’identidade culturale, de sa fiscalidade de profetu, de sa cooperatzione internatzionale, de sa paghe.
S’idea giai est bella. A l’ant a aplicare in presse? Isperemus.
