Sa Festa de su Redentore est arribada a sa de 122 editziones

Sa Festa de su Redentore est arribada a sa de 122 editziones

In su parcu de su Monte, custu mangianu, Mussennor Antonello Mura, pìscamu de Nùgoro e de Lanusè at naradu sa missa solenne, in ammentu de su 29 de agustu de su 1901, cando s’istàtua de brunzu de su Redentore, fata dae s’iscultore Vincenzo Ierace e chèrfida dae Paba Leone XIII pro festare sos 20 sègulos de sa cristianidade, est arribada a su cùcuru de s’Ortobene.

Est custu su momentu prus ìntimu de sa Festa, su chi isetant sos nugoresos e cun issos totu sos sardos. E difatis cust’annu puru in medas sunt acudidos, chie a pee cun su pellegrinàgiu de su mangianu chitzo, chie in postalinu e chie in vetura, pro intèndere sa prèiga de Mussennor Mura, chi at sutaliniadu s’emergèntzia sanitària chi est connoschende su de Nùgoro: unu messàgiu forte a sa classe polìtica regionale e natzionale, presente a sa missa, pro intervènnere e garantire a sos tzitadinos a su mancu sos livellos mìnimos de assistèntzia.

E non sunt mancados sos fideles dae totu sa Sardigna, sas autoridades tzìviles e militares, e sos cantos de su Coro Su Redentore e de su Coro de Nùgoro, chi ant cantadu sa missa.

Eris ant fatu sos festegiamentos tzìviles, cun s’isfilada de sos grupos arribados dae totu sa Sardigna, pro pintare, cun totu sos colores de sa bestimenta traditzionale de sas biddas nostras, sa traditzione e sa fide.

Mariantonietta Piga

Leave a comment

Send a Comment

S'indiritzu email tuo no at a èssere publicadu. Is campos pedidos sunt signados *