Su 17 de freàrgiu est, in Itàlia, sa die dedicada a su gatu, animale chi faghet parte de sa vida de ogna die de milliones de persones. In Sardigna, a prus de sas deghinas de ratzas importadas, bivet su gatu marrudu, nùmene iscientìficu felis silvestris lybica.
Est unu gatu pertigatzu, aizu prus mannu de sos àteros gatos e cun duos tzufigheddos de pilu in sa punta de sas origras.
Ddo’at duas ipòtesis subra s’orìgine sua: una narat ca su gatu sardu e su corsicanu sunt duas ratzas antigas, chi s’agataiant giai in s’era Cuaternària; s’àtera possibilidade imbetzes est chi, bidu ca no ant atzapadu restos fòssiles, siat una genia de gatu orientale lòmpidu a Sardigna a pustis de s’invasione romana e chi s’est agrestadu.
Su gatu marrudu in Sardigna est un’ispètzia amparada dae una lege regionale de su 1978.
(redatzione)
Leave a comment