Su 14 de abrile ant iscobertu una mamaja de sa dermatite bòina in sos tretos de Murera in Ogiastra e dae deretu si sunt ischidados sos mecanismos de amparu a su setore: ant fatu una riunione de s’Unidade tzentrale de crisi su 15 e su 23 totu paret sortu. Chimbe sos pecos malàidos, bator mortos e in sa zona pariant 148 cussos in arriscu. Sas medidas sanitàrias sunt craras: zona de amparu de 25 chilòmetros a inghìriu de sa mamaja, 50 pro sa zona de controllu, proibida de su totu a tramudare e su masone tocadu dae sa maladia depet èssere ochidu totu intreu.
Su pidinu fiat, e abarrat galu, mannu, ca s’annu coladu sa proibida de còmpora, bèndida, e de tramuda de sas bacas aiat fatu dannos maicantos a unu setore importante in sos sartos sardos, mescamente a pustis de progetos de carchi azienda de essire dae sa monocoltura de sa berbeghe tropu ligada a su prètziu de su late fatu dae sos industriales. Difatis, cun una patologia gasi grae, isparta e sena controllu, s’Europa faghet sessare cale si siat essida de bòinos dae s’ìsula, bios o mortos.
Ocannu est capitadu chi in pagu tempus s’azienda de Antoni e Frantziscu Cannas de Murera at bidu iscumpàrrere 190 pegus. Isboidada de sa sienda sua, sena possibilidade de si opònnere. Sa timoria est de èssere arruinados e custu ca su dinari pro su disacatu de su 2025 est lòmpidu petzi a calicunu, ma no a totu cantos sos chi ant sufridu su degògliu de sa chedda issoro.
Su chi ispantat e assuconat est chi sos bitellos malàidos sunt nàschidos dae bacas vatzinadas e sas règulas no faghent diferèntia intre animales immunizados o nono: tocat a los ochìere totu cantos. Cun una campagna de vatzinos chi s’annu coladu at pesadu prus de unu murrùngiu in su setore, custu sèberu de oe, sena sos rimborsos, diat pòdere iscarmentare sos àteros pastores a denuntziare e tando cuare sos casos chi diant pòdere agatare.
Gabriele Tanda
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment