Nd’ant a arresonare in sa prefetura de Nùgoro de sa cuntierra de Tòssilo spa, sa sotziedade de su giassu industriale de Macumele chi li fartat dinare ca no est galu intradu in funtzione su temovalorizadore nou, e chi tenet sos 30 dipendentes sena istipèndiu dae santandria e sena sa treighèsima.
B’at una reunione in su palatzu de su guvernu fissada pro su 26 de ghennàrgiu, ant annuntziadu oe in un’addòviu ammaniadu dae su presidente de sa Tòssilo Antoni Delitala cun sos rapresentantes de Cgil, Cisl e Uil. Pro custa resone, isetende a bìdere ite nde essit dae sa reunione, sos sindacados ant tasidu cada atzione de protesta.
In sa reunione b’ant a leare parte, in prus de sos sindacados, sos rapresentantes de sa sotziedade Tòssilo, sa Provìntzia de Nùgoro e sos assessores regionales de s’Ambiente e de s’Indùstria. S’idea est de apretare sa Regione pro chi onoret sos impinnos chi at leadu siat pro su chi pertocat su termovalorizadore nou, siat pro su chi pertocat sa crisi de dinare de sa sotziedade, chi tenet dèpidos pro unos 4 milliones e mesu de èuros.
“Cherimus cumprèndere pro ite sunt istentende”, – narat su presidente Delitala – e sa matessi dimanda si la faghent sos rapresentantes sindacales, chi semper a cando ant detzìdidu de isetare finas a su 26 in antis de cumintzare cun manifestatziones e isciòperos.
(sa redatzione)
Leave a comment