A pustis de sa relata de su Comitadu tècnicu iscientìficu su guvernu at isseberadu de torrare a abèrrere sas castas de logos galu tancadas o chi sufriat carchi restritziones. Semus faeddende de totu su setore de sa cultura e de s’ispetàculu, cun teatros, museos, tzìnemas e istàdios chi non podiant fàghere intrare totu sa gente chi bi podiat istare. Sa chistione fiat divènnida unu problema massimamente pro su setore de su disaogu, cun sas discotecas chi non podiant abèrrere ca s’arriscu fiat tropu mannu.
Dae s’ùndighi de santugaine in medas logos de cultura non b’at prus bisòngiu de mantènnere unu metru de distàntzia dae una persone a s’àtera. Pro custu sos teatros, sos tzìnemas e sos museos podent torrare a su chentu pro chentu de sa capatzidade issoro de acollida. Pro sos cuntzertos sos istàdios e sos palatzeddos podent acollire a su màssimu su setanta chimbe pro chentu de sa capatzidade issoro si sunt abertos e su sessanta si sunt serrados. Pro sas discotecas est belle su matessi: si sunt tancadas podent fàghere intrare su chimbanta pro chentu de sa capatzidade issoro, si sunt in fora su setanta chimbe pro chentu.
Cun custas detzisiones su guvernu at barigadu sos cunsideros de sos iscientziados e sos dutores chi in sa relata de su Comitadu tècnicu iscientìficu aiant propostu nùmeros prus bàscios mescamente pro sas discotecas, sos tzìnemas e sos teatros. Unu sèberu chi tenet sa punna de dare unu sinnale de normalidade, de essida dae s’apretu de s’epidemia. Unu sèberu però chi benit a tardu meda pro unu setore, su de sa cultura, chi at sufridu tropu de a beru.
Gabriele Tanda
Leave a comment