Sa campagna contra a sos fogos in Sardigna est incarrerada bene e est pronta a parare fronte a unu de sos meses prus metzanos de istiu, ca est pròpiu in trìulas chi amus connotu sos fogos prus destruidores de s’istòria nostra, dae su de Curràggia in Tèmpiu in su 1983 a su de s’annu passadu in su Montiferru e in Pianalza.
Su 2021 est istadu unu de sos peus in totu Itàlia. Rispetu a su 2020 sas framas ch’ant ispèrdidu prus de su dòpiu de sos ètaros. Sa regione prus corfida est istada sa Sitzìlia, sighida dae sa Calàbria. In Sardigna, imbetzes, in su 2021 amus àpidu sa malasorte de patire su fogu prus mannu de totu Itàlia.
Custos datos s’agatant in unu istùdiu de s’ISPRA, s’Istitutu Superiore pro sa s’amparu e sa chirca ambientale de su Ministeru de sa transitzione ecològica. Su documentu sutalìniat chi, in sos ùrtimos 20 annos, su 40-50% de su territòriu ispèrdidu dae sos fogos est a padente. E in sos padentes sa Sardigna, in su 2021, at contadu 40 fogos ebbia; ma su 63% de su territòriu sardu si nche l’at mandigadu su fogu in Montiferru e Pianalza, resurtende su prus mannu in totu Itàlia pro terrinu brusiadu. Su comune de Sennarìolo est imbetzes su chi at àpidu prus dannu in Itàlia, cun su 94% de su territòriu comunale brusiadu; sighit Cùglieri, cun su 39%.
Mariantonietta Piga