de Bovore Mele
Sa relatzione chi ant sos amministradores comunales cun sos polìticos regionales sunt semper de averguare. Su chi si disinnat a livellu locale non semper benit bene retzidu dae sa Regione pro medas resones a fias giustas a fias isballiadas. In una Bidda de Sardigna basada dae sa fortuna ca at un’istèrrida de territòriu e una costa de grandu atrativa turìstica fiant meda annos chi cheriant fabbricare unu zoo. S’idea fiat partida dae una delegatzione a sa cale aiat partetzipadu unu sìndigu e una delegatzione impresariale turìstica de su logu. A custos fiat brincada custa idea bisitende unu zoo e s’idea cojuada deretu dae su sìndigu aiat cumintzadu a faghere passos in antis de totu faghende unu progetu e chirchende finantziamentos. E dae tando si nde fiant ocupados nessis bator sìndigos.
Cada sìndigu aiat su problema de falare a Casteddu a sa Regione pro domandare su finantziamentu de su loto funtzionale proite ca totu paris no lu podiant finantziare. Fiat una gastu mannu e sos traballos inconcant a iscantos. De pustis de aere cuncordadu s’addòbiu cun su deputadu regionale de riferimentu de su territòriu, su sìndigu in tanda moviat a Casteddu a faeddare cun s’assessore regionale a sos Traballos Pùblicos chi su prus de sas fias carchi cosa la daiat pro concruire unu loto funtzionale. Fiat una pelea chi sighiat semper a fortza de lotos funtzionales giutos a dainnantis dae diferentes sìndigos. S’ùrtimu de custos nche fiat arribadu istransidu a depere faghere su biàgiu pro si faghere finantziare s’ùrtimu loto funtzionale. In antis de movere su sìndigu aiat telefonadu a su cussigeri regionale de su territòriu chi peri custa fia depiat cuncordare s’incontru cun s’Assessore a sos Traballos Pùblicos. Ma custa fia bi fiat istadu un’istràviu ca custu aiat torradu s’imposta a su sìndigu pro mediu de su cussigeri ca fiat propriu su casu de cuncordare un’addobiu cun su Presidente de sa Junta Regionale proite sos recursos pro sas obras pùblicas cumintzaiant a impagongiare e issu non podiat disinnare sena de aere su ca eja dae su Presidente. Su sìndigu dudosu aiat faeddadu de sa chistione in sa Junta Comunale in ue sos assessores comunales sacheddende sa conca aiant naradu a su sìndigu ca cheriat a dare cuidadu meda. Difatis in totu custos annos fiant andados a dainnantis sena de aere sa possibilidade de dimustrare craramente cun unu pranu de gerentzia econòmica chite cumbeniu econòmicu bi podiat essere dae custa inversione de dinare pùblicu e tando non faghiat prus a pigare dae su mannadu in tempos de crisi.
Su Presidente de sa Regione fiat un’economista e dae custu puntu de vista fiat meda assentadu in sa matèria econòmica. Su sìndigu in sa riunione de sa Junta Comunale tando aiat concruidu ca fortzis fiat megius pigare totu sos progetos cun sas relatziones de sos pranos de gerentzia econòmica e gasi falare a Casteddu e afrontare su Presidente de sa Regione, documentos a sa manu, pro bidere chite podiat narrere in contra a custu progetu pro su cale si fiat gastada sa pelea de bator sìndigos de sa bidda. Ma in sa Junta Comunale argunos assessores naraiant ca andare a s’addòbiu cun totu sos pabiros fiat un’isballu. Difatis su Presidente fiat capassu de leghere sas relatziones econòmicas e fintzas sos progetos e diat essere intradu in su mèritu de totu sas chistiones e sa timèntzia fiat ca nche diat a aere ismontadu puntu pro puntu totu su resonamentu chi aiat giutu a fabbricare in custos annos su zoo.
Si sìndigu tando aiat arritzadu sas manos infadadu e aiat concruidu sa riunione afirmende “cun megus benit s’assessore comunale a sos traballos pùblicos e andamus a manos iscutas, sena pabiros, cras a a Casteddu a faeddare cun su Presidente de sa Regione in s’ufìtziu suo”. S’in-cras, de pustis de aere fatu unu biàgiu de duas oras, lòmpidos a Casteddu, sìndigu e assessore aiant pigadu s’ascensore e fiant pitzigados a s’istagiu in ue bi fiat s’ofitziu de su Presidente de sa Regione. Un ossieri casteddargiu, grabadu comente a totu sos ossieris de sa Regione, lis aiat finztas domandadu si fiat faghende su tùnniu, però fiat unu mese de Santu Gaine de sigangiu e tùnniu non bi nd’aiat, nche los aiat fatos intrare in s’ufìtziu de su Presidente. Su presidente assentadu in sa cadrea cun sos coidales imbarados a s’iscritòriu, manos incrusadas, chigios ingritzinados de pessone pessamentosa, los aiat fatos apresiare. Acanta a s’iscritòriu b’aiat una mesa prena de pabiros e mapas a piradas e argunas cadreas e siat su sìndigu chi s’assessore no aiant potzidu faghere a mancu de dare un’ograda a cussa mesa domandende·si chite diant essere istados totu cussos pabiros a pirados che a su pane carasadu. Su Presidente, òmine pagu rìsidu e pagu brullanu, lis aiat dadu una mirada a lis aiat naradu in sardu, ca, ispantu faeddada in sardu, “Benebènnidos e Bonas Dies” setzide-bos. ma no in sas cadreas pro istrangiare a presu de s’iscritòriu, ma cuddas cadreas de sa mesa prena de pabiros. E gasi aiant fatu sena de podere faghere a mancu de cumprendere finamentas ca cussas cartas fiant totu cussas de su zoo chi dae sa comuna issoro aiant imbiadu a sa Regione.
Sas mapas e sos pabiros pariant pilurtziadas dae pagu e ischende su chi naraiant totu de custu Presidente in càrriga siguramente fiat istadu issu a las pilurtziare e las istudiare a fine. Su Presidente issu puru si fiat arritzadu e si fiat sètzidu in s’atera mesa cudda prena de pabiros e deretu lis aiat naradu “Apo abbaidadu e letu a fine a fine totu su progetu, sas mapas, su pranu econòmicu e bos depo narrere ca su pranu econòmicu faeddat pro cada annu de unu nùmeru de bisitadores de su zoo, sos chi diant depere gastare pro comporare unu billete, chi est meda sobradu posta a pare cun sas possibilidades reales de bisitadores chi podet aere custu zoo ligadas mescamente a sa populatzione residente in Sardigna chi ischides bene no est sa de sa Lombardia o de su Làtziu e averguados fintzas meda turistas terramannesos chi lompent a sa bidda bostra.
Segundu me mi la timo ca arriscat de essere un’istrutura chi si tramudat a su massamu in chimbe annos in bilantzu passivu. Sende s’ùrtimu loto funtzionale pitzinnos seis galu a tempus pro tramudare sas istruturas edilìtzias in un’iscola materna” . Su sìndigu e s’assessore a calliados e afrajados s’abbaidaiant a pare e no reventiat nemmancu a pispiare paràula, su sìndigu aturdidu bi resessit a sa coa cun sos ogros ispapatados a iscramare “Segnor Presidente depet ischire ca bi sunt giai sas cabias fabbricadas cun sas retzas de atzàrgiu pro nche ponnere sos leones, totu sas feras e fintzas sas lainas” E belle tropellende·si si nch’ispirigat afirmende “E deo …. tando …. sos pipios in ue nche los dia ponnere ….. in sa cabia de sos leones!!!!”. E gasi sìndigu e assessore isporados acasàgiant saludende e si nch’andant comente fiant lòmpidos a manos iscutas a sa bidda issoro e in prus cumbinchidos de essere istados denegados in sa domanda cun s’imposta retzida.
No est su casu de narrere si s’obra a coa est istada finantziada e si de pustis de chimbe annos at su bilantzu passivu, tzertu est ca finztas in custos tempos ferinos de globalizatzione sos pipios non nche los ponent in sa cabbia de sos leones, totu a su prus sunt tempos in ue est prus fàtzile chi in sa cabia de sos leones nche ingrebient sos amministradores.
Leave a comment