Podet dare chi siat una Giunta noa sa chi at a parare fronte a s’ùrtimu annu e mesu de legisladura. Su cuadru polìticu nou a livellu natzionale at apretadu sa verìfica in Sardigna puru.
Sa bìnchida de Fratelli d’Itàlia, divènnida sa prima forza polìtica, cun una pertzentuale de votos prus arta de sos de Lega, Psd’Az e Forza Itàlia postos paris, at mudadu sos echilìbrios. Sa Giunta Solinas difatis depet nominare sos duos assessores chi si nche sunt andados. Giorgio Todde s’est dimìtidu dae sos trasportos una paja de dies in antis de sas eletziones, in polèmica cun sos issèberos de sa Lega. Gianni Lampis, Fratelli d’Itàlia, l’ant eletu a sa Camera e s’at a dimìtere dae assessore a s’ambiente.
Su Movimentu 5 Stelle puru, chi in sas eletziones natzionales at leadu prus votos de su PD, como est pensende a ammaniare una coalitzione pro s’opònnere a su Tzentrudestra. Sa batalla como at a èssere cussa pro s’issèberu de su candidadu a sa presidèntzia de sa regione.
Mariantonietta Piga