In giru de pagu tempus amus chistionadu de berbeghes pro tres bias: pro sa de Pandora; pro sas duas de Briatore chi issas ebbia connoschent a Alzachena; pro sas de Giannelli a palas de Solinas in intro de una sàtira bamba che ludu publicada eris in su Corriere. Emmo, bamba. Mischinu Giannelli, unu chi non nch’ischit lòmpere a su chi sa sàtira meresset, unu chi nch’abarrat in su binòmiu “gregge = pecore” e chi – lampu de genialidade – nos nche ponet agigu de lana in dossu. Sa chistione est semper sa matessi cada borta: a beru nos devimus inchietare pro essidas de custa genia? Posca, emmo, s’imàgine sua podet èssere sa sìntesi de una mirada particulare de chie, addae de su mare, nos bidet gasi e gasi bi la cheret sighire; ma cheret chi cumprendemus si est a tìmere o mancu chi reatziones che a sas de eris potzant èssere sa sìntesi de sa dipendèntzia nostra dae su giudìtziu emìtidu in penìsula. Deretu est lòmpidu su paragone cun Charlie Hebdo. Ma il Itàlia mancat una revista che a cussa, capatze de iscùdere a chie si siat. De prus, podimus nàrrere chi sunt paritzos sos chi no ant retzidu bene s’imàgine de eris e chi in su tempus coladu reghente s’ant istratzadu sos pilos sa sàtira frantzesa “contra” a s’Itàlia. Si diant ofèndere pro una sàtira sarda “contra” a su continente? E cantos intre sos inchietos de eris sunt oe ispartzinende ingiùrgias contra a sos migrantes? Tocat a sighire a carchi grupu in facebook pro s’iscumprou. In s’ìnteri sas reatziones polìticas nos mustrant duos leghistas sardos (Giagoni e Saiu) contra a Giannelli e su presidente Solinas chi imbetzes si nch’essit cun un’artziada de palas. A concruos, si aìamus faeddadu in sardu capatze chi l’aìamus pòdida mutire “immunidade de grupu” che a sos catalanos e che a sos galitzianos. Ca inoghe sa chistione est finamentas su limbàgiu chi de-umanizat.
màuru piredda
Leave a comment