de Mauro Piredda
Agabbu de istiu. S’acùrtziat s’ora de su referendum pro s’indipendèntzia de sa Catalugna. In Sardigna creschet sa freba e sa gana de fàghere sa matessi cosa finas a pustis de sas polìticas tzentralistas de su presidente de su cussìgiu Renzi. Cosa de non creere, comintzant a si cunvocare addòbios territoriales pro chistionare de sa situatzione polìtica e sotziale de Sardigna.
Non mancant sas caras betzas de sa polìtica isulana. No lis paret beru e giai comintzant a bisare gente chi lis ponet in fatu sena cunsiderare su tempus coladu, cando ant guvernadu sa regione, o cando ant sètzidu in carchi cadrea romana. Non mancat nemmancu carchi sìndigu de su matessi partidu chi in Roma (e in Casteddu) at detzisu de segare sas resursas e de minimare sos trasferimentos. “No est nudda no est nudda, bastet chi prene sa udda!” cantat in intro de isse unu de custos chi est pro leare sa paraula: «Popolo sardo, è giunta l’ora…» «…s’ora de faeddare in sardu mascittè!», li rispondet unu giòvanu universitàriu avesadu a intèndere professores chistionare de sardu in italianu. S’onorèvole comintzat a s’isbutonare sa cravata, su suore, artziende·si dae su tzugru, comintzat a l’ifùndere sa mustatzera e sos cherbeddos. In sa conca sua s’atinu de èssere in cue in cue a fàghere una figura de merda. “Lo stai facendo nel modo sbagliato” pensat. E pensare chi fiat pensende a si fàghere unu “selfie”… S’addòbiu arribat a sos concruos e su moderadore, a pustis de àere annotadu totus sos interventos, ponet a votatzione unu documentu, iscritu in sardu de bidda. Cun carchi faddina ortogràfica, ma che a sas chi faghet su grandu nadadore sa prima bia chi, pitzinnu, si nche ghetat a modde. No est nudda…
Àteros addòbios agabbant cun documentos normados, arregulados, ammoddiados, a segunda de su traballu fatu in sas biddas dae sos operadores de sos ufìtzios. In unos cantos addòbios est s’operadore etotu chi annotat. Cada addòbiu at detzisu, però, a pitzu de sa netzessidade de si torrare a bìdere pro pònnere a cùrrere sas rivendicatziones de su pòpulu sardu. E gasi siat. Addòbiu mannu, mannu meda in Paulle. Caras betzas e caras noas. Current sas paràulas de sos prus giòvanos. Sos prus mannos comintzant imbetzes a animare sos màrghines de sa sala pro fàghere contos e contigheddos che a unu cungressu de partidu. Ma, cosa de non creere, s’addòbiu, in ue totus ant faeddadu cun sa variante issoro, agabbat cun una lìnia comune: «devimus pedire unu referendum pro s’indipendèntzia sarda e a lu fàghere su matessi mancari chi non bèngiat atzetadu!».
Ma in cummissione polìtica comintzant sos dolores de matza. S’acordu brincat ca non b’at unione in su sèberu de sa grafia de impitare pro su documentu finale. Totu brincat e si detzidet «de nos torrare a bìdere in atòngiu a pustis de àere fatu unu referendum pro seberare sa grafia». Acò sos grupos facebook “Referendum di Sardegna/de Sardigna/de Sardenya” e “Referendum oi!”. Casinu mannu. Gente chi si nde bogat sa camisa che a gestu de disafiu, otavas e batorinas càrrigas de fele, chircas de “x” e de “th” in sos libros sardos, mincras a lampalughe, paghe/pache/paxe/paxi in perunu logu… A Renzi no li paret beru. Ma b’at unu problema. Pro pagare sos interessos pro su dèpidu pùblicu cumuladu est custrintu a bèndere sa Sardigna. Si la còmporant sos catalanos. Si la torrant a leare, sena “batalla”, ca sos sardos si l’ant fata pari pari…
In custu contu mancat sa Regione. Ca como a b’est?
foto: Deviantart
Leave a comment