de Angelo Canu 
Unos de sos sitos italianos de sa APPLE dat a ischire chi sos Macintosh dae s’atòngiu de su 2014 ant a giùghere unu sistema operativu nou, OS X 10.10 Yosemite, cun “app” noas e meda prus potentes de sa chi bi sunt oe.
Intre sas particularidades de su sistema operativu OS X 10.10 bi nd’at una chi podet èssere de importu mannu pro sa crèschida de sa limba sarda e su reconnoschimentu suo in sa comunidade internatzionale: sa possibilidade de impostare limbas chi fintzas a oe non sunt reconnòschidas a livellu internatzionale, che a su sitzilianu e su napoletanu, chi però sunt reconnòschidas dae s’UNESCO.
Mancat però su sardu.
Su contu est unu pagu paradossale, ca limbas chi in Itàlia non sunt reconnòschidas dae sa lege che a limbas (ma che a dialetos) ant a tènnere una visibilidade in totu su mundu mentres su sardu, reconnòschidu che a limba dae sos linguistas e dae sas leges, no at a èssere mustradu pro su chi est.
Diat tocare a sa Regione Autònoma de sa Sardigna, a sinnalare a sa sotziedade americana chi su sardu tenet giai unu curretore ortogràficu sardu (CROS). Su traballu diat èssere duncas giai belle che fatu, ma s’ufìtziu chi lu podiat e lu depiat sinnalare (Ufìtziu de sa Limba Sarda,) est istadu mutzadu o a su mancu non tenet prus sa manera de traballare che a in antis.
Ca fintzas su de isforrogare una possibilidade che a custa fiat parte de unu sistema de traballu ingeniosu; e non podende cròmpere a isboligare sa faina crompiat nessi a avisare s’assessoradu pro aparitzare sa faina.
E como?
A avisare sa Regione bi pensamus nois, ma b’at calicunu in Regione chi s’at a afainare a tentare s’impresa de pònnere su sardu in su mundu?
Leave a comment