Novas dae sa sotziedade de Cupertino. Dinare a banda, ca su preju preventivadu non fiat cosa pro totus, sa Apple Car no est una vetura chi amus a guidare. Sa cosa essit a campu in custas dies dae sas colunnas de Bloomberg. E in cue est chi benimus a connoschèntzia de sa serrada de su dipartimentu internu pro s’isvilupu de s’automòbile elètrica intelligente cun guida autònoma. Unu de profundis chi serrat un’isetu prus chi non longu.
Su progetu no l’ant mai presentadu a su pùblicu ma beru est chi b’ant gastadu milliardos de dòllaros, chi b’ant traballadu deghe annos e chi b’aiat belle 2mìgia dipendentes traballende·bi. Su Project Titan, custu su nùmene ufitziale, naschet su 2014. Sa punna fiat de fraigare una màchina priva de volante e de cumandos pedales ma chi podiat èssere controllada dae remotu in casu de netzessidade.
Colende su tempus su progetu s’est trasformadu in una “simple” vetura elètrica de livellu artu (pagu prus o mancu che a sa mègius Tesla in tzirculatzione) cun unu preju de 100mìgia dòllaros. De prus: b’at àpidu càmbios in sa diretzione de su dipartimentu cun Kevin Lynch de Apple Watch chi aiat leadu su logu de su responsàbile de Project Titan, Doug Field, andadu a traballare pro sos de sa Ford. Su progetu ant sighidu a l’isvilupare mancari totu custu dende atentzione manna a totu sa cumponentìstica software e hardware pro sa guida indipendente, a su propulsore e a s’estètica interna e esterna.
Finas a cando non si sunt abbigiados chi, nointamen su tempus e su dinare gastadu, sa cosa non torraiat a contu. Sos màrgines de profetu fiant bassos meda. Diat pàrrere totu a postu pro su bonu de sos traballadores impignados: a sos isvilupadores los ant a sistemare in sos progetos ligados a s’intelligèntzia artifitziale; a sos ingegneris e a sos disegnadores nche los ant a pònnere in àteros dipartimentos de Apple; àteros diant pòdere essire dae s’azienda.
Gianfranca Orunesu
Leave a comment