Dae cras sa Sardigna est ruja: su retiru at a èssere de 24 oras; in prus de ristorantes e tzilleris ant a serrare pilucheris e tzentros estèticos, tzilleris, ristorantes; peruna bìsita a amigos o a parentes in domo, nemmancu su babbu e sa mama; atividade fìsica e cane a passìgiu prus chi non regulados; didàtica in presèntzia finas a sa prima mèdia. In su mentres su virus sighit a s’ispainare befende·si·nde de infogràficas fartosas, de sos chi ant autotzertificadu in sas retes sotziales su “mi nd’afuto” issoro, de su chi fiat “l’indice Rt più basso d’Italia”, de sa goliardia de cando fìamus arbos befende·nos·nde de sos terramannesos, de su «capolavoro di Nieddu e Solinas» annuntziadu carchi chida a como dae Zoffili e de sos chi pensaiant a un’assentu diferente cun Mario Draghi: eris 425 cuntàgios noos, 5 ricòveros in prus (sunt 55 e fiant 19 su primu de martzu). E si medas casos cunfirmados custa chida pertocant cuntàgios dae su 29 de martzu a su 4 de abrile, galu semus a ischire ite nd’at a essire dae sas dies rujas de Pasca. Sa polìtica, sa de sa propaganda a fitianu (eris ant abertu unu tzentru vatzinos in Cuartu sena chi b’esseret su sìndigu), sa de “Sardi sicuri” non meda e de “Sardi vaccinati” su matessi, sa chi impreat su “mi nd’afuto” de unos cantos pro cuare su “non so a tretu” suo, nudda podet nàrrere.
màuru piredda
Leave a comment