Foto leada dae su situ ufitziale de su partidu Şor
A pustis de àere proibidu a Calin Georgescu de si presentare a sas presidentziales de ocannu, sas autoridades rumenas ant fatu su pròpiu cun Diana Şoşoacă chi sas chidas coladas s’est bida negare sa possibilidade de partetzipare a sa cumpetitzione eletorale.
Şoşoacă fiat sa candidada indipendente de destra e su 15 de martzu s’ufìtziu eletorale at istabilidu s’inegibilidade sua.
Sas positziones polìticas de Georgescu e Şoşoacă sunt bastante sìmiles: natzionalismu, e duncas rechestas de essire dae s’Unione europea, e traditzionalismu cristianu.
Sa motivatzione pro s’esclusione de Şoşoacă, chi est parlamentare europea, est uguale a sa chi dd’at negadu sa candidadura in sas eletziones de su 2024, a coa annulladas, est a nàrrere acusas de incumpatibilidade cun sos valores democràticos.
Si no èssere europeistas in Romania est problemàticu ddu est galu de prus su tènnere positziones de amistade cun sa Rùssia.
A sa base de s’esclusione de Georgescu difatis ddo’est s’acusa chi a unu de sos collaboradores suos dd’ant atzapadu dinari de provenièntzia russa.
Pagu prus a mancu sa matessi sorte dd’at tenta Evghenia Guţul, guvernadore de sa Gagaùsia, regione de sa Moldàvia populada dae una minoria ètnicu-linguìstica. In su 2023, custa s’acusa, in campagna eletorale, paret chi apat leadu dinari de provenièntzia non segura semper dae Rùssia. Su 25 de martzu coladu duncas dd’ant arrestada in s’aeroportu de sa capitale moldava Chişinău mentras fiat imbarchende·si pro sa Turchia.
Su 2 de abrile sa Corte de Apellu at respintu su ricursu presentadu dae sos avocados e Guţul at a abarrare in custòdia cautelare finas a su 22 de custu mese.
Sos gagausos s’intendent ligados pro resones istòricas a sa Rùssia e su russu, paris cun su gagausu, est sa limba issoro. Guţul e su partidu suo Şor, chi sas acusas siant beras o frasas, rapresentant duncas sa volontade populare.
(gianni muroni)