Foto leada dae https://pnl.ro
Su guvernu rumenu est rutu. S’esecutivu de minoria cun a capu Ilie Bolojan (in sa foto), de su Partidu Liberale Natzionale, at tentu unu votu de isfidùtzia eris 5 de maju. Sa votatzione at registradu 281 parlamentares in favore e 4 contra.
A fàghere mancare sa fidùtzia a Bolojan est istadu finas su Partidu Sotzialdemocràticu, alleadu suo. Su votu contra est bènnidu finas dae s’AUR (Alleàntzia pro s’Unione de sos Rumenos), su partidu de destra.
Sa situatzione polìtica in su paisu de s’est europeu sighit a èssere complicada. Su candidadu de s’AUR a sas presidentziale de ocannu passadu, George Simion, aiat denuntziadu interferèntzias èsteras , chi a pàrrere suo aiant favoridu su contràriu suo Dan, chi teniat positziones europeistas.
Simion si fiat presentadu a pustis chi su candidadu indipendente de destra Calin Georgescu fiat istadu eliminadu pro bia giuditziària dae sa cumpetitzione eletorale.
Sas acusas de sa destra rumena ant tentu una cunfirma cando s’ex capu de sos servìtzios segretos frantzesos Alain Juillet at denuntziadu, pagu chidas a como, interferèntzias de s’Unione Europea pro indiritzare sa diretzione polìtica de Ungheria e Moldàvia e addiritura pro seberare chie depiat guvernare in sos duos paisos.
Sa càusa printzipale de custa crisi est sa polìtica de austeridade econòmica, in lìnia cun sos inditos de Bruxelles, adotada dae Bolojan. A èssere penalizados sunt massimamente pensionados e traballadores.
Bolojan, 57 annos, est istadu presidente de su senadu e presidente de sa Repùblica ad interim. Fiat in càrriga comente primu ministru dae su mese de làmpadas de su 2025. Sa coalitzione de guvernu incruiat puru su Partidu Sotzialdemocràticu, s’USR (Unione Sarvade sa Romania), su partidu de su presidente de sa Repùblica Dan, e s’UDMR (Unione Democràtica Magiara de Romania), chi est espressione de sa minoria ungheresa.
(gianni muroni)
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment