Rispetu a su 2019, sas fèminas traballant prus pagu e sunt prus disocupadas.
Custu su datu chi essit a campu dae s’indàgine “Il trend della ripresa 2021-2022 e alcune evidenze di genere”, de s’Ufìtziu Istùdios de Confartigianadu Sardigna ammaniadu pro Donne imprese.
Una fotografia chi ponet in craru su fatu chi sunt sas fèminas a pagare su prètziu prus artu de sa crisi econòmica pro neghe su Covid-19, cun sa minimada de impresas artesanas, faturadu e traballu.
In Sardigna sas impresas femminiles sunt belle 40 mìgia; de custas belle 6 mìgia sunt artesanas. In custu setore sa minimada, rispetu a su 2015, est istada de su 0,6%, de s’11% rispetu a su 2008.
S’Ocupatzione femminile indipendente, in sos duos annos de pandemia, est minimada de su 7,8%, a fronte de su 6,1% in mancu registradu dae sas aziendas ghiadas dae òmines.
Su faturadu mèdiu de sas impresas femminiles est de 4,4 puntos percentuale in mancu rispetu a sa mèdia.
“Nois semus sas imprendidoras de sa resilièntzia – sutalineat Maria Amelia Lai, presidente de Confartigianadu Sardigna – e onni die semus impinnadas a su dòpiu pro acumpangiare sas aziendas nostras cara a unu benidore de isvilupu”.
Sa presidente Lai cunsiderat de profetu sos fundos apòsitos in arribu cun su PNRR e sos interventos ammaniados dae su Guvernu natzionale, mescamente su fundu pro agiudare s’impresa femminile in pessu publicadu in sa Gazeta Ufitziale.
“Su fundu – narat Maria Amelia Lai – est un’oportunidade pro agiudare, afortiare e isvilupare sas impresas femminiles, dende cara mescamente a sas atziones in favore de sa cultura e de sa formatzione imprendidoriale”.
Mariantonietta Piga