Tres chircas de istitutos diferentes sunt de acordu: in Itàlia sa Crèsia est perdende a sa lestra fideles. In austu s’Istat at publicadu una chirca chi at a intro fintzas informatziones a subra de su comportamentu religiosu. Sa cantidade de chie andant a missa una borta a sa chida in bint’annos est falada dae su 36,4% a su 18,8%, belle su mesu; chie non b’andat pro nudda at barigadu su trinta pro chentu. Sa menguada est prus forte in sos adolescentes e post-adolescentes chi colant dae prus o mancu su trinta pro chentu de su 2001 a prus o mancu su deghe pro chentu de ocannu.
Fintzas sa Crèsia at fatu fàghere una chirca a subra de custos nùmeros. Su 5 de santugaine in Camaldoli su prof. Segatti, sotziòlogu de s’Universidade de Milanu, at presentadu sos resurtos de sa chirca sua, cumandada dae sa rivista «Il Regno». Sos nùmeros sunt prus nidos puru de sos de s’Istat. A suta de sos trint’annos sos agnosticos sunt belle su trinta pro chentu. Chie andat a crèscia nessi una borta a sa chida est su 18%, chie non b’andat mai su 37%. Chie narat de crèdere in Deus est su 57% pro chentu, mancari su 72,7% decrarat de èssere catolicu, in su mentres chie non bi credet est su 36%.
Un’àteru sondàgiu a subra de sa matessi faina est essidu pro Youtrend. Si cunfirmant sos nùmeros de sos àteros duos, ma in ie si podet bìdere sa diferentzia intre sas zonas de Itàlia e intre livellos de edade. Sa Sardigna est a suta de sa mèdia de s’Istadu: 16% sos chi andant a missa nessi una borta a sa chida. Sas ùnicas edades chi ant prus praticantes chi non praticantes sunt sos pitzinnos prus minores de 13 annos e sas persones cun prus de 65 annos. Sas zonas prus afitianadas a abitare sa missa sunt sas de su meridione.
Un’àteru datu chi sinnalat comente su raportu cun sa religione de sos sardos e de sos italianos est mudadu est sa manera de si cojuare. Giai dae su 2021 su ritu tzivile est prus impreadu de su religiosu: 54% contra a su 46%. In Sardigna su nùmeru est prus artu puru cun unu datu chi barigat su 60% de sos tziviles. A s’imbesse in su sud Itàlia si còjuant de prus in crèsia.
Sunt datos chi acùrtziant s’Itàlia a su chi est capitende in su tzentru de Europa, in ue (pro esempru Germània, Frantza e Rennu Aunidu) ant cantidades de àteos e non credentes chi sunt sa maioria de sa populatzione.
(redatzione)
Leave a comment