Referendum sena cuorum e gente paga andada a votare sunt su resurtadu de sas eletziones amministrativas chi eris ant cramadu sos italianos a s’espressare subra de sas 5 dimandas chi pertocant sa Giustìtzia e a elèghere prus o mancu milli sìndigos.
A livellu natzionale pro su referendum sa pertzentuale est arribada a su 20,8%; in Sardigna est andada peus, firmende·si a su 14,4%. Pro sas dimandas referendàrias, propostas dae Lega e Radicales, est su resurtadu prus metzanu registradu, singiale chi servit una riforma de custu istitutu.
In sas comunales puru sas pertzentuales sunt minimadas: su 54,72% a livellu natzionale, su 56,3% in Sardigna cun 7 puntos in mancu rispetu a sos annos passados.
In Sardigna si votaiat in 65 comunes, 26 cussos ue ant giai eletu unu sìndigu, ca bi fiat una lista ebbia e bastaiat petzi a nche colare su cuorum.
In Aristanis at votadu su 54,8% de sos eletores, cun su 3% in mancu; in Ceraxus est andadu a votare su 47,6% de sos tzitadinos, su 6,3% in mancu rispetu a sas eletziones passadas.
Mariantonietta Piga