Rèdditu e cultura, s’apellu in rete

Rèdditu e cultura, s’apellu in rete

Est in lìnia dae eris s’apellu de su mundu de sa cultura pro su rèdditu e su traballu in Sardigna. Medas sunt sas firmas chi sunt lompende a sustennu de s’idea chi diat chèrrere amparare s’arte indipendente in custu periòdu de virus corona e pro su tempus benidore. Nd’amus chistionadu cun Giovanni Fara, editore, su primu firmatàriu.

de Màuru Piredda

In s’apellu b’at unas cantas pregontas a sa Regione. Sa prima pertocat su rèdditu de dignidade pro totu cantos. Cales benefìtzios pro sa subravivèntzia de cada espressione artìstica?

Una medida che a custa diat frunire agigu de ossìgenu a sos chi ant dèvidu firmare s’atividade issoro. Mescamente sos prus minores sunt sos chi timent de non torrare a traballare che a primu, nen su benidore lis oferit garantzias. Est unu problema de cada setore e in Sardigna tenimus, pro su prus, un’economia minuda de artesanadu e cummèrtziu, de ispetàculos, festival, intratenimentos artìsticos e musicales mescamente in istiu. S’istajone imbeniente paret chi siat cumprumissa e sas solutziones annuntziadas paret chi non siant de giudu mannu in custa emergèntzia. Sa cultura sighint a la bìdere comente carchi cosa chi no est essentziale, ma inoghe b’at mìgias de persones chi bi traballant sena chi siant pigadas in cunsideru comente diant chèrrere.

S’àtere pregonta pertocat un’impinnu pro unu pranu triennale de investimentos in contu de cultura. In intro de custu pranu bi cherides sas Comunas sardas e sos artistas locales. Pensades a dinare de destinare a sas biddas o un’albu regionale?

Pensamus a una programmatzione regionale cun sas Comunas protagonistas in sa valorizatzione de sas espressiones artìsticas locales. Ma mescamente pensamus chi siat essentziale a dare impèllida a un’orizonte istratègicu culturale pro sa Sardigna. “Liberare s’arte” ghetende a terra impèigos burocràticos e detassende cada gènere de ispetàculu o manifestatzione artìstica, màssimu intre sas minores chi sunt sas prus penalizadas.

B’at unu passàgiu in s’apellu: «Una programmazione culturale […] che valorizzi anche la lingua e la cultura sarda». Pro ite «anche» e non “mescamente”?

In Sardigna b’at àpidu unu repressione linguìstica ferotze. Su bonu de sas espressiones artìsticas e culturales si sunt isvilupadas in intro de dinàmicas coloniales e post-coloniales chi ant cajonadu s’impreu massivu de s’italianu e de s’inglesu comente limba veicolare. Ma cada forma de arte s’espressat pro mèdiu de còdighes chi podent èssere in su matessi tempus locales e internatzionales, semper orgànicos a su cuntestu territoriale in ue naschent. Fata custa premissa doverosa est de importu chi una batalla che a custa colet dae su deretu de sos sardos a imparare e a faeddare sa limba issoro, valorizende duncas totus sas espressiones artìsticas.

A chie bos pregontat dae ue tocat a pigare su dinare, ite li rispondides?

Est dae tempus chi sa Regione ponet milliones de èuros pro finantziare eventos mannos, dende rispostas a s’ispissu a sa grandu indùstria de s’ispetàculu, avantagende petzi a personàgios famados e ponende·nche a banda sos artistas e sas formas de arte locales. Eventos mannos chi podent caminare cun sas ancas issoro renuntziende a resursas chi sa Regione diat dèvere ratzionalizare mègius intre chi, in Sardigna, s’interessat de cultura e de ispetàculu.

Leave a comment

1 Comment

Send a Comment

S'indiritzu email tuo no at a èssere publicadu. Is campos pedidos sunt signados *