Est sighende, in sas frecuèntzias de Ràdiu Rai Sardigna, su contu de sa “Divina Commedia” bortada in limba sarda dae Padre Pàule Monni.
A pustis de sas primas dòighi Istàntzias dedicadas a s’Inferru, sunt cumintzadas sas trasmissiones de su Purgatòriu. S’apuntamentu est sa domìniga mangianu a sas 9,05 in Ràdiu 1. Ant giai trasmissu duas puntadas e bi nde mancat àteras bator. Su regista e iscenegiadore est Carlo Rafele. Sos atores sunt Elio Turno Arthemalle e Lia Careddu.
Ma, ite nos narat su regista? «Càntiga de sa suspensione, rennu de sa tràmuda, su Purgatòriu divenit su logu in ue mègius si connotat e si iscòviat s’intritzu de Dante poeta isperimentadore de una limba noa e s’individu Alighieri pregonadu dae sa tzitade sua etotu e disterradu, ponende duncas in campu sa rapresentatzione de unu mundu chi bàntzigat intre sa terra e su chelu, probianu e larganu in su matessi tempus, in ue pro cada ànima su disìgiu de su bene supremu faghet sos contos cun sa passione de ànima dolimosa de su chi unu est istadu. Sos pessonàgios si faghent ispigru crìticu de custu registru dòpiu: pro nàrrere, si in sa prima Istàntzia su mùsicu Casella podet espressare sa transidura sua de agatare s’amigu Dante galu biu e intonare pro issu una de sas cantzones prus famadas, in sa segunda Istàntzia Catone Uticense, su tzitadinu de Utica mortu a manu sua pro afirmare sos sèberos suos de libertade, leat sas funtziones di bardianu, revindichende, duncas, su primadu morale de su rolu terrenu suo”.
Finas a como tenimus, in sardu, duas tradutziones de sa Divina Commedia: custa chi est trasmitende sa Rai, fata dae Padre Paule Monni, cumpletada in su 2003 cun s’editzione de sa de tres càntigas (Della Torre, Casteddu), e s’àtera, prus antiga, de su canònicu Pedru Casu, essida in sos annos 30 de su 900.
(sa redatzione)
Leave a comment