Puigdemont lìberu, ma non de su totu

Puigdemont lìberu, ma non de su totu

Custu fine chida Puigdemont e àteros personàgios catalanos de importu depiant andare a s’ADIFOLK in s’Alighera e posca addobiare sos rapresentantes de sa Corona de Logu, s’assòtziu de sos amministradores indipendentistas sardos. Custos ùrtimos aiant batidu sa solidariedade de sa Sardigna pro sa persighida de s’Istadu ispagnolu contra a su caminu de autodeterminatzione de sa Catalugna e, pro torrare gràtzias, su presidente coladu de sa Generalitat cheriat imbènnere sos polìticos sardos.

S’idea fiat cussa de faeddare in Aristanis de su caminu chi sas duas natziones sunt fatende pro sa libertade issoro, ma sos programmas de s’addòbiu pariant cambiados dae s’arrestu de Puigdemont a pustis chi su polìticu indipendentista est faladu a s’aeroportu de s’Alighera. Sa politzia italiana at sighidu s’òrdine de arrestu de sa giustìtzia ispagnola, andende contra a sas mòvidas chi fintzas a como sa majoria de sos Istados europeos aiat tentu: amparare sos rapresentantes indipendentistas. Difatis mancari Puigdemont est un’eurodeputadu cun s’immunidade, s’Istadu italianu at detzisu de lu arrestare su matessi.

Oe, dae sas noe, partidos e assòtzios indipendentistas sardos aiant ammanigiados una manifestatzione a probe de su tribunale de Tàtari, in ue b’aiat s’udièntzia de cunvàlida de su firmu, pro pedire chi su polìticu cadalanu esseret liberadu prus a prestu. Su giùighe de Tàtari at isseberadu de lu lassare lìberu, ma sena si nche pòdere andare dae Sardigna finas a cando no ant a detzìdere pro s’estraditzione a Ispagna.

Gabriele Tanda

Leave a comment

Send a Comment

S'indiritzu email tuo no at a èssere publicadu. Is campos pedidos sunt signados *