Sa Corte de Apellu de Tàtari at torradu sa libertade a Carles Puigdemont a pustis de s’arrestu de eris. Cunforma a custos disinnos s’ex presidente diat èssere lìberu de si mòvere ma s’at a dèvere torrare a presentare in Sardigna su 4 de santugaine, cando ant a chistionare de sa rechesta de estraditzione. Eris b’at àpidu duncas un’evolutzione de sa cunditzione sua in giru de pagas oras. A comintzu pariat chi non podiat nemmancu lassare sa Sardigna. Ma como, a ue nch’at a pòdere tzucare? S’Ispagna – comente ammentat oe Nicolò Migheli in sa Nuova Sardegna – aiat escluidu s’arrestu pro Puigdemont, europarlamentare privadu de s’immunidade, francu chi no esseret torradu a su territòriu de s’istadu suo. Tando, o s’Istadu ispagnolu est faulàrgiu o cunsìderat sa Sardigna galu parte de su Rennu borbònicu. Tenet resone, duncas, Puigdemont a nàrrere chi «Espanya no perd mai l’oportunitat de fer el ridícul». A Puigdemont, sa politzia italiana, cunforma a sos inditos de Madrid, l’at arrestadu in S’Alighera, tzitade chi, arresonende a manera pancatalanista, faghet parte de sos Països Catalans, est a nàrrere de cussu ispàtziu natzionale chi nch’est in intro e in foras de s’istadu ispagnolu. E si como, pro nàrrere, Puigdemont nche tzucaret a Andorra, ite diat fàghere s’Ispagna?
redatzione
Leave a comment