L’ant publicada eris in su BURAS, su Bulletinu Ufitziale de sa Regione, sa manovra finantziària 2022.
“Bìnchere sa batalla contra a s’ispopulamentu, in favore de s’isvilupu locale, est unu de sos obietivos prus importantes chi semus sighende dae cando est cumintzada sa legisladura, e como est una de sas lìnias printzipales de sa manovra. Pro sa prima borta si ponet in campu dinare siguru e netzessàriu pro permìtere a sa Sardigna de gherrare cun fortza contra a s’ispopulamentu de sos territòrios e contra a s’isulamentu” at naradu su presidente de sa regione Christian Solinas.
Su presidente at ammentadu peri sos àteros puntos importantes de sa manovra, chi ponet dinare pro sas famìlias chi istant o si nche tràmudant sa residèntzia a sos comunes de non prus de 3mìgia abitantes, e unu bonus nàschida chi arribat fintzas a 600 èuro a su mese pro cada fìgiu naschidu in su 2022, fintzas a cando non fachet sos 5 annos.
E semper pro andare contra a s’ispopulamentu, est prevìdidu su contributu fintzas a 15mìgia èuro pro torrare a nou sa prima domo pro chie istat o si nche tràmudat sa residèntzia a sos comunes suta sos 3mìgia abitantes.
Mariantonietta Piga