Proposta CSU: un'iscola prus forte e autònoma cun su bilinguismu istatutàriu

– de Giuseppe Corronca –

Su 29 de Austu coladu si sunt reunidos in su T-Hotel in Casteddu sos istados generales de s’iscola sarda. Promotore de s’initziativa est su deputadu de UNIDOS Mauro Pili, acumpangiadu dae Ignazio Perra, insinnante e ativista polìticu e chi at bidu sa presèntzia de delegatziones dae tota sa Sardigna de sos Comitados de base, sindacados e insinnantes.

Est istadu unu mangianu de atòbiu e cunfrontu profetosu acumpangiadu dae interventos e testimonias pro aboghinare cun fortza su No a sa mòvida de sos dotzentes in àteras regiones, in virtude de su fatu chi sos postos in Sardigna bi sunt e faghende leva subra de s’ispetzifitzidade de sa Sardigna comente regione.

Est istada s’ocasione fintzas pro aparitzare unu “Manifestu pro s’autonomia e sa renàschida de s’iscola sarda”, in ue si dimandat a sa Regione de si ativare pro torrare a afirmare s’ispetzifitzidade e s’autonomia didàtica de su sistema de formatzione in Sardigna.

A sustegnu de custa initziativa non podiat mancare sa presèntzia de su Coordinamentu pro su Sardu Ufitziale chi deo apo tentu s’onore de rapresentare. Comente insinnante e membru de su CSU apo giutu sos saludos e sa solidariedade de su Coordinamentu a totus sos collegas dotzentes e in sos pagos minutos a disponimentu apo chircadu de marcare sas crititzidades de su sistema iscolàsticu in Sardigna pro more de su fatu chi s’iscola sarda dependet in totu dae su MIUR, sena peruna autonomia, si non nominale (e a bortas nemmancu cussa). A pustis de àere marcadu s’importu de su bilinguismu e de su plurilinguismu in generale, a pustis de mi èssere atrividu a nàrrere a lìteras craras chi bisòngiat a àere unu istandard pro tènnere unu reconnoschimentu ufitziale dae parte de s’Istadu e ambire a carchi cosa de prus, cunforma a su pagu chi tenimus como in tèrmines de tutela e impreu de su sardu, so coladu a sas propostas cuncretas, poninde in cara a totus sos presentes s’esigèntzia de torrare a negotziare sos raportos cun s’Istadu. S’obietivu ideale (ma no impossibile) est modificare (o torrare a iscrìere) s’Istatutu Ispetziale de sa Sardigna, poninde·bi a intro su riferimentu a s’istatus de minoria linguìstica cun su sardu parificadu a s’italianu (bilinguismu perfetu); in alternativa, de àere in contu s’art. 5 de s’Istatutu, chi previdit in sa lìtera (a) chi sa Regione emitet normas de integratzione e atuatzione in matèria de “istruzione de ogni òrdine e gradu, ordinamentu de sos istùdios”.

Apo acabadu s’interventu cumbidande a totus sos chi creent chi su sardu non serbit a nudda de essire dae una visione dialetale e folclorìstica de sa limba e abaidare su sardu comente oportunidade manna pro isfrutare s’autonomia nostra ponende·lu a fundamentu de una iscola sarda benidora, cunsiderande·lu comente istrumentu de identidade inseridu in unu cuntestu atuale e modernu chi rechedet s’impreu in cada àmbitu fitianu.

Non cuo sa sodisfatzione manna cando apo bidu medas collegas de acòrdiu cun custas propostas chi, est beru, sunt annos e annos chi si nde faeddat sena perunu resurtadu, ma est beru puru chi torrare a pònnere sa chistione est de òbligu.

Su mangianu est acabadu cun unu interventu balorosu e “energicu” de Ignazio Perra e cun su cumbidu dae parte de Mauro Pili de èssere unidos in custa batalla.

S’apuntamentu est pro custa chida in Roma, a suta de su Ministèriu de s’Istrutzione. Sigomente custu guvernu paret surdu a origas (forsis ca in Sardigna semus atesu meda) sa punna est cussa de aboghinare prus a costàgiu. Chissai chi gasi at a intèndere.

Giuseppe Corronca