Su guvernu Draghi, pro impressare su Recovery plan, at ammanigiadu unu cuncursu pro pònnere gente noa in s’amministratzione pùblica de su Sud, totu gente chi at istudiadu e chi at unu curriculum de primore. Su cuncursu est pro duamìgia e otighentos tècnicos chi ant a traballare in Abrutzu, Molise, Campània, Pùllia, Basilicata, Calàbria, Sitzìlia e Sardigna. Su problema est chi sas chimbe seas in ue fàghere s’esàmene sunt in chimbe giassos (Calàbria, Campània, Sitzìlia, Làtziu e Pùllia) serente a totus sos candidados, francu a cussos sardos. Difatis, sos candidados de inoghe ant a dèvere biagiare e lòmpere a sas seas cun istorbos medas, ca sos aèreos e sos navios non sunt medas comente a prima e sunt gastosos. Suprende in sas seas s’istrachidùdine non at a èssere sa matessi de sos àteros candidados chi ant leadu petzi unu trenu. A s’agabbu no est chi podent torrare deretu, ma s’ant a leare fintzas un’aposentu in carchi ostera de in ie, cun àteros gastos.
S’arriscu est chi, de cussos dughentos e degheoto tècnicos chi pertocant a s’ìsula nostra, pagos ant a èssere sardos e non pro neghe de su gabbale issoro, ma pro neghe de sos istorbos chi s’Istadu at postu in mesu caminu. In su mentres sos giòvanos sardos depent tzucare ca inoghe non b’at traballu. Un’àtera proa chi sos sardos non sunt tzitadinos comente sos àteros e chi sa Sardigna tenet unu giassu minore in sa conca de su guvernu italianu.
Una manera pro amparare sos sardos giòvanos, sa cultura e s’economia nostra podet èssere de mìntere, comente critèriu de custos concursos pùblicos, fintzas sa cumpetèntzia de sa limba sarda, comente giai càpitat in Trentinu e in Friuli cun sas limbas issoro. Unu traste chi podet intrare a iscola pro su sèberu de sos mastros, e in s’amministratzione pro cussu de sos funtzionàrios. Est dae annos medas chi si pedit a sa Regione e a s’Istadu italianu una lege in custu surcu, ma pagu est istadu fatu de a beru.
(redatzione)
Leave a comment