Pro sos italianos sos aumentos de s’ùrtimu annu si bident mescamente in su prètziu de sa cosa de papare: sos datos Istat, sutaliniados peri dae su Tzentru Istudios de CIA natzionale, ponent in pistighìngiu, registrende unu aumentu de s’inflatzione de s’11,9% a s’annu. Unu datu peus s’agatat in làmpadas de su 1983, cando s’inflatzione nch’aiat coladu su 13%.
S’elaboratzione CIA at interessadu sos prètzios de sos benes alimentares in italia in su 2022. Dae ghennàrgiu a oe una famillia, pro fàghere s’ispesa, at gastadu 384 èuro in prus. Sos produtos chi ant aumentadu de prus sunt cussos friscos e cussos de sa trasformatzione agroindustriale.
Ma a registrare sos aumentos prus artos, rispetu a santugaine de su 2021, sunt sos produtos agrìculos, sa cosa de mandigare e de bufare analcolica: su 13,1% in prus. Aumentos chi ant a pagare mescamente sas famìlias e sas impresas agrìculas.
Mariantonietta Piga