Eris sa BCE at naradu chi, a pustis de deghe annos, àrtziat sos tassos de interesse a subra de su dinari. Non fiat una cosa ispantosa, gente meda l’ischiat, ma a su matessi at postu in abbolotu sas bursas europeas e mescamente cussa de Milanu. Sa diferèntzia intre sos tìtulos de Istadu italianos e sos tedescos (chi s’imprenta italiana mutit semper spread) est brincadu in pagu tempus a subra de dughentos.
Ma ite cheret nàrrere custa chistione e pro ite l’ant fata? Cando b’at s’inflatzione chi creschet a sa lestra, su dinari perdet balore ca bi nd’at tropu a giru. Artziende su prètziu de su dinari si proat a li torrare a dare su balore giustu e a menguare sa cantidade de soddos a giru, ca est prus caru a fàghere mùtuos e àteros prèstidos. Su problema però est chi artziare sos tassos, pro su prus, si faghet cando s’economia est currende pro istransire s’inflatzione, ma como no est gasi. Sos prètzios sunt creschende pro sa gherra e sa pandemia in Tzina (chi est firmende sa produida de ogetos medas), ma fiant ismanniende dae prima, a pustis de sa pandemia. S’economia però est belle che firma: de soddos nde girant pagu de prus. Su problema est chi pro agiudare s’economia sos economistas cussìgiant de mìntere soddos in sa sotziedade, ma gasi su dinari perdet balore. S’arriscu tando est chi custu sèberu potzat allentare una crèschida chi giai dae como est andende a lenu. In ue si tocat si faghet dannu: arressare sos prètzios o agiudare sa crèschida?
Sa BCE depet leare sa prima optzione. Ma lu faghet non ca est malèsiga, ma ca est nàschida pro amparare sa moneda europea: sa crèschida est faina de sos guvernos de sos Paisos. Sa punna de custa ischìrria est mantènnere s’èuro in echilìbriu e isperare in sas polìticas de sos Istados.
(redatzione)
Leave a comment