In S’Alighera, in sa Biblioteca Mediterranea, su 10 de nadale ddo’at àpidu su primu Forum sull’editoria regionale. S’initziativa, dedicada a sa memòria de s’iscritore Toti Mannuzzu, fiat de s’AES, Associazione Editori Sardi, e de sa ADEI, Associazione degli editori indipendenti.
Su tema fiat s’iscoberta e sa valorizatzione de sas identidades, bidu ca sos grupos editoriales prus mannos sunt interessados a una Sardigna istereotipada ebbia.
Marco Zapparoli, presidente de s’ADEI, at faeddadu de su bisòngiu de interventos pro sa bibliodiversidade, finas pro fàghere a connòschere limbas e culturas minoritàrias.
Pro Simonetta Castia, presidente de s’AES, pro pròmovere sa nàschida de una retza chi funtzionet tocat a partire dae su territòriu, isperende chi fatzant una lege pro su libru.
Pro sa Regione Autònoma de Sardigna su Diretore Generale a sos Benes Culturales Renato Serra at annuntziadu chi paris cun s’AES pro su 2021 ant programmadu de agiornare sa norma de setore.
Sunt intervènnidos puru su portaboghe de su ministru pro sos Benes e Atividades Culturales e Turismu Gianluca Lioni, s’assessore a Cultura e Turismu de S’Alighera Marco Di Gangi e su diretore de su Salone Internatzionale de su libru de Torinu, Nicola Lagioia.
(redatzione)
Leave a comment