Est abertu su cuncursu de prosa in sardu intituladu a Màuru Deledda, editzione 2023. Nàschidu in Pasada in su 1927 e mortu in su 1989, pintore e intelletuale impignadu in sa valorizatzione de sa limba sarda, paris cun àteros cumpàngios de ideale, che a Gianfranco Pintore, Deledda aiat fundadu, in sa bidda nadia, su Prèmiu de literadura sarda Casteddu de sa Fae, in su 1979.
Su cuncursu baroniesu, puntu de riferimentu pro sa prosa in sardu, at premiadu, in sos annos, a: Mialinu Pira, Benvenuto Lobina, Gianfranco Pintore, Palmiro de Giovanni, Giancarlo Tusceri, Giuseppe Tirotto, Pitzente Mura, Gonàriu Carta Brocca, Larentu Pusceddu e Jubanne Piga.
Custu prèmiu literàriu, pro onorare sa memòria de Deledda, est organizadu dae sos familiares, dae sos Amigos de Màuru Deledda, dae sa Sotziedade pro sa limba sarda e dae Papiros Editziones.
Su cuncursu est riservadu a romanzos inèditos e mai premiados nen signalados in àteros cuncursos. S’òpera depet èssere longa nessi 70 pàginas, de 60 caràteres e 30 rigas ognuna. Sa variedade de sardu impreada depet èssere sa Limba Sarda Comuna.
Cheret mandada una còpia in pabiru a sa Segreteria de su “Cuncursu de prosa in sardu Màuru Deledda”, c/o Sotziedade pro sa Limba Sarda, carrera de Dante 19, 08100 Nùgoro (NU) e ateruna còpia in documentu de testu (word) a s’indiritzu de posta eletrònica sotziedadeprosalimbasarda@.
Sas òperas depent arribare intro su 15 de martzu in ambos duos sos formados, pabiru e eletrònicu. Comente prèmiu pro su binchidore ddo’est sa publicatzione de su libru, 30 còpias in regalu, sa presentatzione in una bidda diferente pro ogna editzione de su prèmiu e in sa bidda de s’autore etotu, a prus de su diploma de binchidore de su prèmiu Màuru Deledda.
Su romanzu chi at a bìnchere ocannu at a èssere presentadu in Nùgoro su 18 de abrile.
(gianni muroni)
Leave a comment