Prèmiu Maria Carta 2021

Prèmiu Maria Carta 2021

Domìniga 5 de cabudanni in Sìligo ddo’at àpidu sa de deghennoe editziones de su Prèmiu Maria Carta. Sunt istados premiados sa cantadora olianesa Maria Luisa Congiu, su Tzìrculu Acsit (Associazione Cultiurale Sardi in Toscana) de Firenze, rapresentadu dae su presidente Angelino Mereu, s’azienda Numera, de su grupu BpER, e Joe Perrino.

S’artista casteddaju, chi fiat bestidu cun su gipone de sos militzianos de Santu Efes, at propostu sa de tres tapas de su progetu Canzoni di malavita, paris cun Flavio Piga a sas tastieras e Alessio Olla a sa chiterra.

Durante sa die si sunt esibidos diferentes artistas: Federico Marras Perantoni, Beppe Dettori cun Raoul Moretti, su tenore Su Populu Sardu de Ulìana, Elisa Carta cun Francesco Piu, sos Fantafolk cun Valeria Carboni, sos Tazenda e su ballete de su sòtziu Kerkos.

Sa manifestatzione, nàschida in su 2003, ocannu chi benit at a afestare sos binti annos e su presidente de sa fundatzione Maria Carta Leonardo Marras, chi organizat su prèmiu, at giai annuntziadu chi su de binti anniversàrios dd’ant a fàghere semper in sa bidda de sa cantadora.

Pro s’ocasione est istadu presentadu unu vìdeu musicale, realizadu dae Mauro Fancello, cun un’interpretatzione de Non potho reposare, chi ddo’ant partetzipadu sos Fantafolk, Paolo Fresu, Valeria Carboni e Nilo, Maria Giovanna Cherchi, Beppe Dettori e Raoul Moretti, sos mamuthones e sos issohadores de Mamujada e Luca Mascia de sos Niera.

Sos premiados ant retzidu ampullas de binu Anninnìa, cannonau biancu de sas cantinas Bonamici de Mamujada, dedicadu pròpiu a Maria Carta.

At presentziadu su presidente de su Cussìgiu Regionale Michele Pais e fiant presentes finas padre Moritu e su retore de s’Universidade de Tàtari Gavino Mariotti.

S’editzione de ocannu faghiat parte de su progetu Salude e Trigu de sa Càmera de Cummèrtziu Nord Sardigna.

(gianni muroni)

Leave a comment

Send a Comment

S'indiritzu email tuo no at a èssere publicadu. Is campos pedidos sunt signados *