Nch’est lòmpidu a sa de bator editziones su prèmiu “Donna di scienza”. Su cuncursu est promòvidu dae s’assòtziu “ScienzaSocietàScienza” in collaboratzione cun unas cantas realidades: sas universidades de Tàtari e de Casteddu, s’Inaf e s’Oservatòriu astronòmicu de Casteddu, sa setzione casteddaja de su Infn, sa sede de s’Istitutu de neuroiscièntzias de Casteddu de su Cnr, s’assessoradu de sas Oportunidades parìviles de sa Comuna de Casteddu e Gi.U.Li.A. Giornaliste Sardegna. Sa punna sua est sa de dare su reconnoschimentu giustu a fèminas de gabbale chi apant dadu contributu mannu a su caminu iscientìficu de sa Sardigna.
Podent partetzipare fèminas nàschidas o cun s’atividade issoro in Sardigna o pro sa Sardigna, e chi si siant apentadas in s’àmbitu de sa chirca iscientìfica finamentas cun s’impreu de sos mèdios de comunicatzione.
S’assòtziu organizadore si impignat pro chi si difundat sa cultura iscientìfica e cunsìderat sa relatzione intre fèminas e iscièntzia «unu intre sos temas chi meressent – si leghet in su situ dedicadu – de èssere giutos a in antis».
Sas candidaduras depent èssere imbiadas a s’indiritzu de posta eletrònica premiodonnascienza@gmail.com intre sas 13:00 de su 10 de trìulas sighende sos inditos presentes in su situ https://www.festivalscienzacagliari.it/it/premio-donna-di-scienza-quarta-edizione/. Sa binchidora at a retzire unu prèmiu in dinare de 2000 èuros e una targa de ammentu. Sa premiatzione at a èssere in intro de su Cagliari FestivalScienza prevìdidu in s’EXMA dae su 10 a su 13 de santandria.
Gianfranca Orunesu