Prèmiu a sa musicòloga tataresa Maria Borghesi

Prèmiu a sa musicòloga tataresa Maria Borghesi

Maria Borghesi at bintu sa prima editzione de su Premio Giovanni Morelli, intregadu dae s’universidade venetziana Ca’ Foscari, pro sa tesi dotorale subra sa retzida culturale de Bach in s’Itàlia de su Noighentos.

Sos giurados fiant professores de sas universidade de Milanu, Venètzia e Gènova e su prèmiu est intituladu a su musicòlogo Morelli, mortu deghe annos a como.

Borghesi, tataresa, at leadu su dotoradu in s’universidade Carl Maria von Weber de Dresda. At istudiadu in su litzeu Azuni e in su cunservatòriu Canepa. A coa at postu in fatu a sa maistra sua de pianoforte Lucia Pittau in Mantova e s’est diplomada in su cunservatòriu de Brescia.

In Cremona, in su dipartimentu de s’Universidade de Pavia, at istudiadu, finas a si leare sa làurea magistrale, musicologia cun una tesi subra Bach.

A su cumposidore tedescu at intituladu, paris cun sa collega Chiara Bertoglio, s’assòtziu JSBach.it. Borghesi, chi bivet intre Lombardia e Toscana, torrat de pagu in pagu a Tàtari. Ocannu passadu at organizadu duas dies de istùdiu dedicadas a su tema Bach e l’Italia, a intro de su festival Note senza Tempo.

(redatzione)

Leave a comment

Send a Comment

S'indiritzu email tuo no at a èssere publicadu.