Premio Ozieri, publicadu su bandu de sa de 63 editziones

Premio Ozieri, publicadu su bandu de sa de 63 editziones

Publicadu su bandu de sa de 63 editziones de su Premio Ozieri

redatzione


BANDU DE SU CUNCURSU 2022

Su “Prèmiu de Otieri”, fundadu dae Tonino Ledda in su 1956, contivizat atividades chi agiuat sa cultura, sa limba e sa literadura de Sardigna.

Iscadèntzia, su 30 de Làmpadas 2022

RÈGULAS DE PARTECIPATZIONE
Sos trabàglios devent giòmpere a su Prèmiu intro de su 30 de lampadas de su 2022 in posta eletrònica o in pabilu, a sèberu de su poeta, in una de custas maneras:

• imbiende su documentu de sos trabàglios, iscritu in Word, a s’indiritzu de posta eletrònica: info@premiozieri.it
• imbiende sos trabàglios in pabilu a sa Segreteria de su “Prèmiu Otieri” de Literadura Sarda – Via Ugo La Malfa, 28 – 07014 OZIERI (SS).

S’at a tènner contu de sa data de de sa posta eletrònica o de su sizillu postale

Sunt ammissas a su Prèmiu sas òperas in limba sarda e in gadduresu, tataresu, saligheresu e tabarchinu.

• Sos trabàglios devent giùghere iscritu, in finitia e in d-ogni copia, nùmene e sambenadu de s’autore, data e logu de nàschida, s’indiritzu giustu e su nùmeru de telèfono (sa posta eletrònica, pro chie l’at) ue si diat chèrrere giuiladu pro d-ogni bisonzu. Su “Premiu Otieri”, dai
tempòrios longos, no ammitit “pseudònimos” e anonimadu.
• Si podet imbiare finas carchi riga de “curriculum” e novas subra a s’autore.
• Sos poetas chi sèberant de imbiare in pabilu, devent imprentare in 8 (oto) còpias cabales, chi si potant lègere bene.
• Agradessimus cussizos pro mezorare su Prèmiu. Est agradessidu finas unu glossàriu de sas paràulas pius pagu impreadas e connotas de sas biddas bostras, o nessi de sas chi bos parent pius importantes a las signalare. Ponide sas annotatziones in unu file a banda, o intro de sa busta, chena las cosire a sos trabàglios chi imbiades a su cuncursu.
• Totu sas fainas ant a èssere inèditas e non devent àere àpidu reconnoschimentos in àteros cuncursos literàrios a sa die chi los sezis imbiende a nois.
• Semus regogliende totu sas fainas bostras in su Centru de Documentascione pro lis poder dare s’importu chi meritant. Finas sas òberas chi non ant a resurtare premiadas sunt una prenda manna.

SETZIONES
1. POESIA SARDA INÈDITA “Antoni Sanna”
Ogni cuncurrente podet imbiare una poesia a tema lìberu (cun rima o chentza rima). Si devet imbiare finas una còpia de sa tradutzione in limba italiana. Sos chi iscrient in saligheresu o in tabarchinu devent imbiare finas sa tradussione in limba italiana.
Si racumandat de non ch’essire dae su lìmite de 40 (baranta) versos.

2. PROSA INÈDITA “Ànghelu Dettori”
Ogni cuncurrente podet mandare unu contadu o calesisiat iscritu in prosa, a tema lìbberu. Sas fainas chi imbiades devent càbere, dae pius a mancu, in 5 (chimbe) pàginas iscritas a màchina o a computadore (corpus 12). Si devet imbiare finas una còpia de sa tradutzione in limba italiana. Ogni còpia in pabilu devet essere cosida e pronta a la seberare pro sa giuria.

3. TRA POESIA E CÀNTIGU INEDITA “Antoni Cubeddu”

Destinada a sa poesia cantada o de cantare. Ogni cuncurrente podet imbiare una cantone a tema lìbberu, sighende sos ischemas e sas frommas poèticas e mètricas ligadas a su connotu (nìnnidos, atìtidos, glossas, cantadas in lira, gosos, cantones torràdas, modas, modellos, mutos, repentinas, e àteras). In custa setzione non bi cheret sa tradutzione in limba italiana, ma est agradessidu meda si nos imbiades unu glossàriu cantu pius cumpletu. Nos ant a fàgher piaghere, pro los contivizare in su Centru de Documentatzione, finas sos inditos chi s’autore nos cherferat imbiare subra sos ischemas antigos e sas frommas poèticas chi at impreadu, leende in cunsideru sas mètricas de su connotu e finas cussas pius nòdidas impreadas in bidda sua.

  • Chie imbiat in posta elettronica a info@premiozieri.it, devet iscrìere sa setzione in s’ogetu de sa email (es. Prosa «Angelo Dettori»);
  • Chie imbiat sas òberas in sa posta, devet iscrìere subra a sa busta su nùmene de sa setzione (es. Setzione Poesia Sarda Inedita «Antoni Sanna», etc.).

 

PREMIOS ISPECIALES
Podent finamentas èssere assignados prèmios ispeciales. Sas poesias e sos contados premiados paris cun cussos chi sa Giuria dessignat de imprentare, podent èssere postos in su cuadernu antologicu annuale.

PRÈMIU EMIGRADOS
In mesu a sos emigrados unu o pius autores ant a retzire una Targa de su “Premio Ozieri”.

PRÈMIU SPORT
Unu premiu a banda est destinadu dae su Panathlon Club de Otieri a unu trabàgliu a sèberu de sa Giuria chi contet sos valores ladinos de su sport.

SOS PRÈMIOS DE SU CUNCURSU
S’ant a dare prèmios in dinari a sos primos tres classificados de ogni setzione, e sas targas e medàglias nòdidas cun s’imprenta de su Prèmiu.

AVERTÈNTZIAS
Pro no èsser esclusos, dade cuidadu a sas règulas e pius de totu a su chi est evidentziadu.

ÀTERAS AVERTÈNTZIAS
• Si cuncurret a s’indonu e non benit pedida tassa peruna.
• Si podet leare parte a una o a pius de una setzione.
• Sos binchidores podent torrare a bìnchere in cussa matessi setzione solu a pustis de tres annos.
• Sas fainas non benint torradas insegus e su Sòtziu si reservat sa facultade de las publicare cando e comente podet capitare, finas in sa ràdio, in sa televisione e in sos mèdios telemàticos, chena pagamentu perunu a s’autore. S’autore, però, est semper padronu de sa faina chi at iscritu e nde podet dispònnere a piaghere sou.
• A leare parte a su cuncursu, cheret nàrrere chi s’autore atzetat in pienu sas règulas istabilidas dae su bandu de su Premiu literariu “Città di Ozieri”.

CENTRU DE DOCUMENTATZIONE
Semus cogliende totu sos trabàglios chi pertocant a sos poetes e a sos iscritores de Sardigna: maniscritos, lìbberos, fotografias, filmados e àteru. Semus costoende inie totu su chi amus retzidu in sessant’annos e pius de impignu nostru e bostru, pro lu lassare a eredade a istudiosos e a amantiosos de oe e de su benidore, a manera de sighire sas àndalas de un’idea chi non morit.
Si podet bìdere su trabàgliu già cumpridu in su situ: www.premiozieri.it
S’atividade sighit annu cun annu, cunfromma a sas possibilidades nostras, finas chi bi resurtet totu su chi su Prèmiu at retzidu dae cando est nàschidu. Carchi duda b’est ancora: pro more chi sos trabàglios che los imbiaiant anònimos (finas a su 1980, dae pius a mancu), cun su pseudònimu o paranùmene o cun d-unu motu, a dolu mannu no essint a pizu nùmene e sambenadu de sos autores. Chie est a tretu de nos pòdere agiuare pro cumprèndere nùmene e sambenadu de sas òberas anònimas, podet iscrière a: info@premiozieri.it
o a sa setzione “Contatti” de su situ www.premiozieri.it
Sos autores chi sunt interessados a lassare, dae como o unu cras, a su Centru de Documentatzione, totu o in parte, sa produtzione literaria e documentos issoro, nos lu podent fàghere ischire cun sos matessi mèdios (email info@premiozieri.it).

SA GIURIA DE SU PREMIO OZIERI 2022:
Presidente: Dino Manca
Vicepresidente: Anna Cristina Serra
Componenti: Cristiano Becciu, Antonio Canalis, Duilio Caocci, Francesco Cossu, Clara Farina, Attilio Mastino, Riccardo Mura, Gianbernardo Piroddi, Salvatore Tola.

Leave a comment

Send a Comment

S'indiritzu email tuo no at a èssere publicadu.