B’at fintzas un’àteru 25 de abrile. Su de su Portugallu chi su 1974 aiat ghetadu a terra sos contones chi fraigaiant s’Estado Novo, est a nàrrere sa ditadura prus betza de Europa. Ammentare custa data cheret nàrrere reconnòschere chi sa libertade no est mai unu fenòmenu isoladu, ma unu contàgiu netzessàriu chi nche brincat sas fronteras. Non fiat unu corfu de istadu ma una rivolutzione, sa Rivolutzione de sos gravellos. Beru, mannu fiat su ruolu de su Mfa, su Movimentu das fortzas armadas. Ma custa cumponente de s’esèrtzitu non fiat una casta militare in chirca de poderiu. Fiat unu movimentu progressista de ufitziales giòvanos istracos de èssere petza de masellu pro un’imperu intrinende·si·nche. Custos sordados, trasformados in cuadros polìticos pro more de una realidade crua e grae, aiant cumpresu chi sa democratzia in Lisbona fiat impossìbile sena sa fine de su colonialismu de Caetano. Sa Resistèntzia de sos movimentos de liberatzione de su Mozambicu, de s’Angola e de sa Guinea-Bissau aiat dadu contributu mannu intreghende a custos militares portughesos una grandu cussèntzia de classe. Custos sordados non podiant èssere òmines lìberos in pàtria si su bratzu issoro serbiat a oprimire àteros pòpulos in àteras alas de sa terra. Sa rivolutzione fiat duncas un’atu de solidariedade decoloniale. Cun sos gravellos in sa canna de su fusile. E in cussa rivolutzione b’at àpidu unu momentu chi su pòpulu non fiat mirende ebbia a una democratzia formale — sa chi est fata de ischedas eletorales cada tot annos ma de lìberu mercadu in favore de pagos cada die — ma a una furriada sotzialista sustantziale. Ocupatziones de terras, controllu operaju in sas fàbricas e nazionalizatziones fiant sas orminas de unu percursu chi cheriat aterrare sos raportos de fortza capitalìsticos. Mancari cussa ispinta radicale l’apant “normalizada” sas currentes moderadas (fintzas sas comunistas) e sas pressiones internatzionales, su 25 abrile portoghesu abarrat un’esèmpiu: non fiat petzi una transitzione ma su bisu de unu mundu nou chi, pro un’iscuta, pariat possìbile.
mauro piredda
Attività realizzata col contributo della Regione Sardegna – IMPRENTAS 2025/2026. LR 22/2018, art. 22
Leave a comment