Portu Turres at registradu un’èsitu mannu in s’editzione de ocannu de Monumenti Aperti, chi teniat a islogan Pratiche di Meraviglia. Sas vìsitas sunt lòmpidas a 7.439 dae sas 3.365 chi fiant in su 2022. Inaugurada sàbadu 3 de làmpadas a sas 15,30 in sa turre aragonesa, cun una rievocatzione istòrica de su sòtziu Giudicato di Torres, sa manifestatzione est sighida sa die de domìniga, mancari s’abba apat custrintu a lassare belle semper serrados sos sitos de Su Crucifissu Mannu e de Balai a tesu.
Est istada sa de dòighi editziones pro s’antiga capitale turritana. A s’organizatzione, coordinada dae sa Comuna, ant collaboradu iscolas, sòtzios, universidade e Crèsia locale. Custu s’elencu cumpletu de chie at cuntribuidu: Memoria Storica Soc. Coop., Associazione Culturale Giudicato di Torres, Istitutu comprensivu n. 1, Istitutu cumprensivo n. 2 “Don Antonio Sanna”, Istitutu Superiore “M. Paglietti”, Universidade de Tàtari, sa Direzione Regionale Musei Sardegna, su museu archeològicu natzionale “Antiquarium Turritano”, sa Subrintendèntzia a sos Benes Architetònicos e Paesagìsticos de Tàtari e Nùgoro, Progetto SAI, s’Archidiòtzesi de Tàtari, sa Basìlica de sos Màrtires turritanos, sa crèsia de s’Ispìritu Santu, sa crèsia de Cristos Risuscitadu, su laboratòriu de xilografia Giovanni Dettori, Asso.Ve.La., sa Fondazione Via Libio 53, SardegnaAmbiente Srls.
Sos bisitadores, ghiados dae 600 istudiantes, 90 professores e paritzos voluntàrios, ant pòdidu bìdere bintiduos sitos. Su logu prus bidu est istadu Balai a curtzu cun unas 650 vìsitas. Belle 300 sunt istadas imbetzes sas vìsitas a s’ipogeu de Tanca Borgona. Non podiant mancare in s’elencu su cumplessu monumentale de sa Basìlica de Santu Gaine e s’àrea archeològica de Turris Libisonis
A custu Monumenti Aperti ant partetzipadu finas, pro sa parte musicale, su Coro Polifonico Turritano e Musica Antiqua.
(gianni muroni)
Leave a comment
Ite cosa bella!!